Հանցագործության կատարման համար պատասխանատվություն է կրում ոչ միայն այն կատարած անձը` կատարողը, այլև նրանք, ովքեր այս կամ այն կերպ նպաստել են հանցագործության կատարմանը, նշված անձին են` կազմակերպիչը, դրդիչը և օժանդակողը: Վերջիններս հաճախ կարող են ավելի խիստ պատժի արժանանալ, քան կատարողը:
Քիչ չեն դեպքերը, երբ հանցանք կատարողն ուղղակի պատվեր է կատարում և հանդես է գալիս որպես գործիք, մինչդեռ հանցագործության ծանրությունն ընկած է դրա կազմակերպիչ վրա:
Այժմ, հերթականությամբ անդրադառնանք հանցագործության կատարողին և հանցակիցներին:
Կատարող է համարվում այն անձը, ով անմիջականորեն կատարել է հանցանքը կամ դրա կատարմանն անմիջականորեն մասնակցել է այլ անձանց (համակատարողների) հետ համատեղ, ինչպես նաև հանցանքը կատարել է այլ այնպիսի անձանց օգտագործելու միջոցով, ովքեր օրենքի ուժով ենթակա չեն քրեական պատասխանատվության կամ հանցանքը կատարել են անզգուշությամբ:
Կազմակերպիչ է համարվում այն անձը, ով կազմակերպել կամ ղեկավարել է հանցանքի կատարումը, ինչպես նաև ստեղծել է կազմակերպված խումբ կամ հանցավոր համագործակցություն կամ ղեկավարել է դրանք:
Դրդիչ է համարվում այն անձը, ով մեկ ուրիշ անձի դրդել է հանցանք կատարելու՝ համոզելու, նյութապես շահագրգռելու, սպառնալիքի միջոցով կամ այլ եղանակով:
Օժանդակող է համարվում այն անձը, ով հանցագործությանն օժանդակել է խորհուրդներով, ցուցումներով, տեղեկատվություն կամ միջոցներ, գործիքներ տրամադրելով կամ խոչընդոտները վերացնելով, ինչպես նաև այն անձը, ով նախապես խոստացել է պարտակել հանցագործին, հանցագործության միջոցները կամ գործիքները, հանցագործության հետքերը կամ հանցավոր ճանապարհով ձեռք բերված առարկաները, ինչպես նաև այն անձը, ով նախապես խոստացել է ձեռք բերել կամ իրացնել այդպիսի առարկաները:
