Առողջապահության նախարարի տեղակալ Լենա Նանուշյանը ֆեյսբուքյան իր էջում գրել է․

«Քանի որ կարծես ամբողջ ֆեյսբուկայահությունը հասցրեց արտահայտել իր կարծիքը աղի ավելցուկային օգտագործան նվազեցմանն ուղղված նախագծի մասին, մի քիչ ավելի լուրջ ամփոփենք օրը.

1. Մեր բնակչությունը պատկերացում չունի առողջության համար աղի ավելցուկային օգտագործման վտանգների մասին, չնայած մեծահասակների մի մեծ հատված տառապում է սիրտ անոթային հիվանդություններից,

2. Տարիներ շարունակ տարած իրազեկումը իր նպատակներին չի հասել,

3. Մեկ օրվա մեջ ամբողջ Հայաստանը իմացավ աղի նախագծի մասին ու սկսեց հետաքրքրվել դրա պատճառների մասին,

4. Պետք է ավելի ակտիվ իրազեկում տանել` օգտագործելով նոր մոտեցումներ,

5.Հանրային առողջապահությունը ամենադժվար ոլորտն է ,

6. Բայց մենք ճիշտ ճանապարհի վրա ենք»:

Հիշեցնենք, որ Առոջղապահության նախարարությունը հանրային քննարկման է ներկայացրել «Առևտրի և ծառայությունների մասին» օրենքում լրացում կատարելու մասին» և «Վարչական իրավախախտումների վերաբերյալ օրենսգրքում լրացումներ կատարելու մասին» օրենքների նախագիծ, որի համաձայն՝ հանրային սննդի օբյեկտներում կարգելվի է աղամանի առկայությունը սեղանի վրա` առանց սպառողի կողմից պահանջի ներկայացման:

Այս մասին Իրավաբան.net-ը տեղեկանում է Իրավական ակտերի նախագծերի հրապարակման միասնական կայքից։

Վարչական իրավախախտումների վերաբերյալ օրենսգրքում ևս լրացում կկատարվի․ 158-րդ հոդվածը կլրացվի 45-րդ մասով, որի համաձայն՝ հանրային սննդի օբյեկտներում սեղանի վրա առանց սպառողի կողմից պահանջի ներկայացման աղամանի առկայությունը կա առաջացնի տուգանքի նշանակում տնտեսվարողի նկատմամբ՝ 30․000 դրամի չափով։

Նախագծի հիմնավորման մեջ նշվում է, որ համաձայն ԱՀԿ-ի՝ կերակրի աղի քանակը չպետք է գերազանցի օրական 5 գրամը (օրական <2 գրամ նատրիումին համարժեք), մինչդեռ Հայաստանում դրա օգտագործման ծավալը կրկնակի գերազանցում է ԱՀԿ-ի կողմից սահմանված շեմը:

2016-2017 թթ. ԱՀԿ STEP մեթոդաբանությամբ իրականացված հետազոտության (STEPS) տվյալների` չափահաս բնակչության 35%-ը սնվելիս մշտապես կամ հաճախ աղ է ավելացնում կերակրին (տղամարդկանց 40.3% և կանանց 30.1% ուտելուց առաջ կամ ընթացքում մշտապես կամ հաճախակի կերակրին աղ են ավելացնում), իսկ 71%-ը տանը կերակուր պատրաստելիս մշտապես աղ է ավելացնում: Բնակչության 10-ից 3-ն օգտագործում է մեծ քանակությամբ վերամշակված աղի սնունդ: Բնակչության 21.5%-ը նշել է, որ շատ կամ չափից շատ աղ կամ աղային թանձրուկներ է օգտագործում:

Աղի ընդունման նվազեցումը ԱՀԿ-ի կողմից ճանաչվում է որպես առաջարկվող ամենածախսարդյունավետ միջամտություններից մեկը, որն ուղղված է ոչ վարակիչ հիվանդությունների տարածվածության նվազեցմանը:

Մեր սննդակարգում աղի քանակի նվազեցումը կարևոր քայլ է սրտանոթային հիվանդությունների (հիպերտոնիայի, ինսուլտի, սրտի անբավարարության և սրտի այլ հիվանդությունների) և երիկամների քրոնիկ հիվանդության առաջացման ռիսկը նվազեցնելու համար:

«Առևտրի և ծառայությունների մասին» Հայաստանի Հանրապետության օրենքում լրացում կատարելու մասին» և «Վարչական իրավախախտումների վերաբերյալ Հայաստանի Հանրապետության օրենսգրքում լրացումներ կատարելու մասին» օրենքների նախագծերի ընդունումը` առողջ ապրելակերպի խթանմանն ուղղված միջոցառումների իրականացման հետ համատեղ, կբերի աղի օգտագործումը չարաշահող անձանց քանակի նվազեցմանը և, որպես արդյունք, կբերի ոչ վարակիչ հիվանդություններով հիվանդացության նվազեցմանը։