Ազգային ժողովում Կառավարության հետ հարցուպատասխանի ժամանակ Ագնեսա Խամոյանը նշեց, որ վարչապետ Նիկոլ Փաշինյանը արդեն 2-րդ անգամ հայտարարում է, որ ազդեցության ցանցեր կան Հայաստանում, և «Հայաստան» խմբակցության պատգամավորին մեղադրում է Ադրբեջանի շահերը սպասարկելու մեջ ՝ «Զանգեզուրի միջանցք» ձևակերպումն օգտագործելու համար։
«Ժանրի կանոններով, պարոն Փաշինյան, հիմա ես Ձեզ պետք է մեղադրեմ Ադրբեջանի շահերը լավագույնս պաշտպանելու մեջ, որովհետև դուք եք Ադրբեջանի նախագահին անվանել «կիրթ և կառուցողական», ասել եք, որ նա պատրաստ է հարցի լուծմանը։ Դուք եք նրա հետ Դուշամբեի վերելակում Ձեր նոթատետրի մեջ անհասականալի գրառումներ արել։ Ձեր օրոք ենք կորցրել Արցախի զգալի հատվածը, հազարավոր զոհեր և վիրավորներ ունեցել, տասնյակ հազարավոր անտուն քաղաքացիներ ունեցել։ Եվ, ի դեպ, դուք եք «Էյվազլի և Չայվազլի» ձևակերպումները մտցրել մեր խոսույթ և հայտնվել ադրբեջանական մամուլում»,- նշեց Խամոյանը, որից հետո հարցրեց Փաշինյանին․ «Ակնհայտ է, որ հրաժարական տալով Դուք կարող էիք կանխել պատերազմը և խոստովանում եք, որ անելանելի վիճակ էր բանակցություններում ստեղծվել։ Ուզում եմ հիշեցնել Հանրապետության հրապարակում ձեր հայտարարույթունը՝ «կամ ես կլինեմ ՀՀ վարչապետ, կամ ՀՀ-ն չի ունենա վարչապետ»։
Արդյո՞ք ուժի մեջ է Ձեր այս հայտարարությունը և եթե իրերի ընթացքն այնպես դասավորվի, որ Ձեզ հնարավորություն ընձեռնվի իրավիճակը մեղմելու համար գոնե ձեր թիմակիցներից մեկին փոխանցել վարչապետի պաշտոնը, հնարավո՞ր է,օրինակ ՝ Պապիկյանին կամ Արարատ Միրզոյանին, կամ Ալեն Սիմոնյանին»։
Փաշինյանն արձագանքեց․ «Պատերազմը կանխելու ձևը մեկն էր՝ տարածքների վերադարձը, առանց Լեռնային Ղարաբաղի կարգավիճակի ճշգրտման»։
Ինչ վերաբերում է բուն հրաժարականի մասին հարցին, Փաշինյանն ասաց․ «Ես հրաժարական տվել եմ, դուք էլ եք իմ հրաժարականի շնորհիվ այստեղ նստած: Եթե հրաժարական տված չլինեի, Դուք էլ էիք տիկին Մկրտչյանի հետ հիմա Բաղրամյան պողոտայում քաբաբ անելիս լինելու մանղալների վրա»։
Փաշինյանի խոսքով՝ նրանք են թալանել բանակն ու երկիրը. «Խոսում եք ԱԹՍ-ների մասին, բայց ձեր պաշտպանության նախարարն ասում էր՝ կանսեռվի կոկոշները կախեք դիրքերում, որ ադրբեջանցիք մոտենան, իմանաք: 2016-ին առկա բանակցային ժառանգությամբ տեղի է ունեցել աղետ, երբ Ղարաբաղը կորցրել է Ադրբեջանի կազմից դուրս լինելու գործնական և տեսական հնարավորությունները: Ցանկացած տեղ դա կապացուցեմ: Ուզում եք դռնփակ նիստ արեք, բանակցային բովանդակությունը բերեմ դնեմ սեղաններիդ»:
Դիմելով «Հայաստան» խմբակցության ղեկավար, պաշտպանության նախկին նախարար Սեյրան Օհանյանին՝ ՀՀ վարչապետն ասաց՝ երբ Օհանյանը նախարար էր, ՀՅԴ-ականներն էլ՝ պատգամավոր, կողմ քվեարկեցին վարչատարածքային բաժանման մասին օրենքին. «Օրենքը ընդունվել է նրա համար, որ պատերազմից հերթական անգամ խուսափեք»:
Նիկոլ Փաշինյանի ելույթից հետո դահլիճում աղմուկ առաջացավ, պատգամավորները սկսեցին բղավել: Ընդդիմադիր պատգամավորները վարչապետին հիշեցրին, որ նրա ելույթի ժամանակն ավարտվել է, ինչին ի պատասխան՝ Փաշինյանը նշեց. «Իմ ժամանակը չի ավարտվել, ձեր ժամանակն է ավարտվել: Ղարաբաղ ծախողներ եկել են, ասում են՝ Ղարաբաղը հանձնեցիք, Ղարաբաղը հանձնածները այստեղ են նստած»,- ասաց Փաշինյանը:
