Առողջապահական և աշխատանքի տեսչական մարմինն իրազեկում է դեղատնային գործունեությամբ զբաղվող իրավաբանական անձանց, անհատ ձեռնարկատերերին և սպառողներին․

ՀՀ առողջապահության նախարարության «Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոն» ՓԲ ընկերության կողմից Առողջապահական և աշխատանքի տեսչական մարմին հասցեագրված գրությամբ ներկայացված եզրակացության համաձայն՝ Գերմանիայի դեղերի ոլորտը կարգավորող կառույցից ստացվել են տվյալներ այն մասին, որ Հայաստանում հիվանդի կողմից ձեռք բերված

• «Oxaliplatin AqVida լուծույթ ներարկաման 100մգ, 5 մգ/մլ» և
• «Oxaliplatin AqVida լուծույթ ներարկաման 50 մգ, 5մգ/մլ» (արտադրող AqVida GmbH, Kaiser-Wilhelm-Str. 89 20355 Hamburg, Deutschland) դեղերի
• AGl9O3O2 (AG1903, պիտանիության ժամկետ’ 03.2023) և
• AFl90402 (AF1904, պիտանիության ժամկետ’ 11.2023) սերիաները կեղծ են։

«Oxaliplatin AqVida» դեղը ՀՀ-ում գրանցված չէ, իսկ նշված սերիաների վերաբերյալ տվյալները բացակայում են Փորձագիտական կենտրոնի ներմուծման փորձաքննություն անցած դեղերի բազայում։

Արտադրողի կողմից արտադրվող դեղերի նմուշների հետ հիմնական տարբերությունները հետևյալն են.

• Բնօրինակի սրվակը անգույն թափանցիկ է, իսկ կեղծը՝ մուգ,
• Բնօրինակի կափարիչը սպիտակ է, իսկ կեղծինը՝ կապույտ,
• Սերիայի համարն ու պիտանիության ժամկետը բնօրինակի դեպքում տպագրված է կափարիչին, իսկ կեղծի կափարիչի վրա բացակայում է որևէ նշագրում։

ՀՀ-ում «Oxaliplatin» դեղի գրանցված նմուշներին կարելի է ծանոթանալ «Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոն» ՓԲ ընկերության պաշտոնական կայքում՝ http://pharm.cals.am/pharm/drug_images/index.php հղմամբ։