Դպրոցները պետք է լինեն վերջինը՝ համավարակի պայմաններում փակվողների շարքում և առաջինը՝ վերաբացվողների շարքում։
Այս մասին ֆեյսսբուքյան իր էջում գրել է ՀՀ կրթության, գիտության, մշակույթի և սպորտի փոխնախարար Ժաննա Անդրեասյանը՝ նշելով, որ կարևոր դրույթը հնչեցրել է ՅՈՒՆԵՍԿՕ-ի կողմից կազմակերպված՝ մեկ տարի COVID-ի հետ համաժողովին հիմնական զեկուցողներից մեկը։
«Վիճակագրությունը հուշում է, որ երկրների մեծ մասը հենց այսպես է վարվում. եթե նախորդ տարի այս ժամանակում աշխարհի երկրներից 173-ում կրթական համակարգը ամբողջությամբ փակվել էր, ապա ներկայումս նման քայլի են գնացել միայն 33 երկիր, որովհետև բազմաթիվ հետազոտություններ ցույց են տալիս, թե թվային խզումն ու նոր տիպի անհավասարությունը, ինչպես նաև ընդհանուր առմամբ տոտալ հեռավար կրթությունը ինչպիսի անդառնալի հետևանքներ են ունենում երեխաների զարգացման վրա, հատկապես տարրական դասարաններում։
Դպրոցների՝ համավարակի պատճառով փակ լինելու տևողության վիճակագրությունը տարբեր երկրներում ցույց է տալիս, որ երկրների մեծ մասում, այդ թվում՝ եվրոպական երկրների զգալի մասում, դպրոցները փակ են եղել երեսուն շաբաթ և ավելի։ Երկրներ կան, ինչպես Հարավային Ամերիկայի շատ երկրներ, որտեղ դպրոցները փակ են եղել քառասուն շաբաթ և ավել։ Հայաստանի պարագայում ցուցանիշը 12 շաբաթ է։
Միաժամանակ հիշեցնեմ, որ տարեսկզբից իրավիճակային մոտեցում ենք որդեգրել՝ ըստ դպրոցում դեպքերի թվի՝ դպրոցում ժամանակավոր հեռավար ուսուցման կազմակերպումով, ռիսկի խմբի երեխաների համար կենտրոնացված հեռավար ուսուցմամբ։
Համավարակի թվերի աճը պիտի ուղղորդի բոլորիս ավելի խստությամբ և հետևողական պահպանել կանոնները, որպեսզի առկա ուսուցումը հնարավոր լինի պահպանել»,- գրել է նա։
