Ֆրանսիայում ՀՀ դեսպանությունից հայտնում են.
«Հունվարի 19-ին Ֆրանսիայում Հայաստանի դեսպան Հասմիկ Տոլմաջյանը Լիոն կատարած աշխատանքային այցի շրջանակներում հանդիպեց Լիոնի քաղաքապետ Գրեգորի Դուսեին (Grégory Doucet), Լիոն մետրոպոլի նախագահ Բրունո Բերնարին (Bruno Bernard) և Օվերնյ-Ռոն-Ալպ շրջանի պրեֆեկտ Պասկալ Մայոսին (Pascal Mailhos)։
Հանդիպումների ընթացքում դեսպանը հանգամանալից ներկայացրեց Թուրքիայի աջակցությամբ և վարձկան ջիհադիստների ներգրավմամբ Ադրբեջանի կողմից Արցախի դեմ սանձազերծված ավերիչ պատերազմի հետևանքները և ադրբեջանական զինված ուժերի կողմից իրականացված պատերազմական հանցագործությունները։ Այդ համատեքստում նա մտահոգություն հայտնեց վերջին ամիսներին Ֆրանսիայի տարածքում հայկական հուշարձանների նկատմամբ վանդալիզմի դեպքերի և Ֆրանսիայի հայ համայնքի ներկայացուցիչների հասցեին թուրքական ազգայնական կազմակերպությունների կողմից հնչեցված հրապարակային սպառնալիքների կապակցությամբ։
Դեսպան Տոլմաջյանը շնորհակալություն հայտնեց Լիոն քաղաքի և Լիոն մետրոպոլի կողմից պատերազմի և համաճարակի հետևանքների վերացման նպատակով Հայաստանին ու Արցախին տրամադրված հումանիտար օգնության համար։
Երկուստեք ընդգծվեց հայ-ֆրանսիական ապակենտրոնացված համագործակցության դերը երկու պետությունների միջև առանձնաշնորհյալ հարաբերությունների ամրապնդման գործում։ Շոշափվեցին երկկողմ համագործակցության ընթացիկ հարցեր»։
