Ինչպես արդեն հայտնել ենք, Վրաստանաբնակ մի քանի հայեր Հայաստանին 27 շնչառական սարք են նվիրաբերել։
Aliq.ge լրատվականի հիմնադիր և գլխավոր խմբագիր Արսեն Խառատյանն այս մասին գրում է․
«Ձեր ուղարկած սարքերով մարդիկ շնչում են․
Նախօրդ գիշեր Վրաստանից ուղարկված այս շնչառական սարքերը հասան Նորքի ինֆեկցիոն: Առողջապահության նախարարության գործընկերները ամենահուզիչ բանն ասացին. «Շնորհակալություն, ձեր ուղարկած սարքերով մարդիկ շնչում են»:
Այս 3 օրվա ընթացքում մեզ հետ կապվեցին Ռուսաստանից, Լյուքսեմբուրգից եւ Բելգիայից մեր մի շարք հայրենակիցներ` պատրաստակամություն հայտնելով լրացուցիչ աջակցություն տրամադրել: Այս պահին Վրաստանի իմ գործընկերները փնտրում են հավելյալ սարքեր, որոնք, չնայած ոչ շատ մեծ չափաքանակով, բայց կարծես թե կան:
Եթե այս փոքրիկ սարքերով հնարավոր է անգամ մեկ կյանք փրկել, մենք ջանք չենք խնայելու ապահովել դրանք:
Առո՛ղջ եղեք, պահպանե՛ք սոցիալական հեռավորությունը, փրկե՛ք կյանքեր»:
Գրառմամբ կիսվել է նաև ՀՀ առողջապահության նախարար Արսեն Թորոսյանը՝ նշելով․
«Շնորհակալ եմ Վրաստանի մեր հայրենակիցներին: Իրոք, այս սարքերով մեր պացիենտները շնչում են` բառի ուղիղ և փոխաբերական իմաստներով»։
