ԱՀ ՊՆ մամուլի ծառայությունը երեկ հաղորդագրություն էր տարածել և հայտնել, որ վերջին շրջանում հաճախակի են դարձել ադրբեջանա-ղարաբաղյան հակամարտ զորքերի շփման գծին հարակից տարածքներում հակառակորդի օդային ուժերի կողմից իրականացվող թռիչքները, որոնք կրում են ինչպես ուսումնավարժական, այնպես էլ հետախուզական բնույթ:
«Հատկանշական է, որ նշված գործողություններում, բացի տարբեր տեսակի մարտական ինքնաթռներից և ուղղաթիռներից, ներգրավվում են նաև անօդաչու թռչող սարքեր, որոնք ի տարբերություն առաջինների, հաճախ փորձում են հետախուզական նպատակներով ներթափանցել Արցախի Հանրապետության օդային տարածք: Այդօրինակ փորձերից մեկն էլ տեղի ունեցավ այսօր՝ ապրիլի 21-ին: ՊԲ հարավային ուղղությամբ տեղակայված հակաօդային պաշտպանության ստորաբաժանումները, հավաստանշելով ադրբեջանական ORBITER տիպի անօդաչու թռչող սարքի մուտքը Արցախի օդային տարածք, բերվել են համապատասխան աստիճանի մարտական պատրաստականության և գրագետ գործողությունների արդյունքում՝ ժամը 13:07-ի սահմանում խոցել այն:
ԱՀ պաշտպանության նախարարությունը հերթական անգամ հորդորում է ադրբեջանական կողմին ձեռնպահ մնալ սադրիչ քայլերից ու նաև հավաստիացնում, որ ցանկացած նախահարձակ գործողություն ստանալու է արժանի պատասխան:
Անօդաչու թռչող սարքի բեկորները կհրապարակենք ավելի ուշ»,-նշված է հաղորդագրության մեջ:
Այսօր՝ ապրիլի 22-ին, նախարարութունը հրապարակել է անօդաչու սարքի լուսանկարները․ «Ձեզ ենք ներկայացնում ապրիլի 21-ին՝ ժամը 13:07-ի սահմանում, ՊԲ հակաօդային պաշտպանության ստորաբաժանումների կողմից հարավային հատվածում խոցված անօդաչու թռչող սարքի մնացորդների լուսանկարները»։
![](https://iravaban.net/wp-content/uploads/2020/04/94040595_3272941459404868_2731676209019617280_o.jpg)
![](https://iravaban.net/wp-content/uploads/2020/04/94231926_3272942609404753_6241072967011270656_o.jpg)
![](https://iravaban.net/wp-content/uploads/2020/04/94194310_3272941816071499_4215090473481535488_o.jpg)
![](https://iravaban.net/wp-content/uploads/2020/04/94750282_3272942936071387_1598141783059988480_o.jpg)
![](https://iravaban.net/wp-content/uploads/2020/04/94703898_3272943182738029_659005436707471360_o.jpg)