«ՈՉ»-ի ճակատին է միացել Սահմանադրական դատարանի աշխատակազմի ղեկավար, Վայոց Ձորի նախկին մարզպետ, Հայաստանի հանրապետական կուսակցության Ջերմուկ քաղաքի տարածքային կառույցի երբեմնի ղեկավար Էդգար Ղազարյանը, կոչ է անում քաղաքացիներին չիրացնել Սահմանադրության 2-րդ, անփոփոխելի հոդվածով իրենց վերապահված իրավունքը։ Այս մասին գրել է պատգամավոր Արուսյակ Ջուլհակյանը։
«Ինչպես և իր ղեկավար Հրայր Թովմասյանը, վերջինս ակնհայտորեն մոռացել է, որ ՊԱՐՏԱՎՈՐ է դրսևորել քաղաքական չեզոքություն։ Հասկանում ենք՝ ցայտնոտի մեջ եք, խառն եք, էլ չգիտեք՝ ինչպես շարունակեք կառչած մնալ ձեր աթոռներին, բայց դե շատ եք սիրում խոսել օրինականությունից, բարի եղեք օրենք չխախտել»,-նշել է նա։
ՍԴ աշխատակազմի ղեկավար Էդգար Ղազարյանը իր հերթին գրել է․ «Առաջին անգամ իմ կյանքում չեմ մասնակցելու հանրաքվեին։
Ընտրելու իրավունք ձեռք բերելուց հետո, 1995 թվականի հուլիսի 5-ին առաջին անգամ հնարավորություն եմ ունեցել մասնակցել ՀՀ առաջին գումարման Ազգային ժողովի ընտրությանը և Հայաստանի Հանրապետության Սահմանադրության ընդունման հանրաքվեին։ Այդ պահից ի վեր, ես առանց բացառության, մասնակցել եմ համապետական և տեղական բոլոր ընտրություններին և հանրաքվեներին՝ դա համարելով իմ քաղաքացիական պարտքը և իմ մասնակցությունը բերելով կարևոր որոշումների կայացմանը։ Հետևելով Հայաստանի ներքին կյանքում ընթացող գործընթացներին, կեղծ օրակարգերի ձևավորմանը, անմիտ խնդիրների առաջադրմանը և հակասահմանադրական ու հակաօրինական զարգացումներին` ես որոշում եմ կայացրել իմ կյանքում առաջին անգամ որևէ կերպ մասնակցություն չունենալ 2020 թվականի ապրիլի 5-ին հանրաքվեի անվան տակ կազմակերպված զավեշտին։
Ես չեմ ուզում որևէ կերպ առնչություն ունենալ այդ մեծ ապօրինությանը, որն օրվա իշխանությունները ուզում են փաթաթել մեր ժողովրդի գլխին՝ հերթական անգամ չարաշահելով նրա ազնիվ մղումներն ու զգացմունքները։ Ես կոչ եմ անում իմ բոլոր ընկերներին, բարեկամներին և մտերիմներին, լուրջ չվերաբերվել այդ ամենին, անտեսել այդ կեղծ օրակարգը, զբաղվել սեփական գործերով և որևէ կերպ մասնակցություն չունենալ այդ խարդավանքին։ Հետաքրքիր զուգադիպությամբ 2020 թվականի ապրիլի 5-ին Հայ Առաքելական Սուրբ Եկեղեցին տոնում է Ծաղկազարդը։ Դա հրաշալի առիթ է այդ գեղեցիկ օրը Եկեղեցի այցելելու, օրհնություն ստանալու և ընտանիքի հետ լավ օր վայելելու համար։ ՄԻ՛ ՄԱՍՆԱԿՑԵՔ ՀԱՆՐԱՔՎԵԻՆ»,-նշել է նա։
