Սահմանադրական դատարանը Սահմանադրության ընդունման 25-ամյակի առթիվ հայտարարում է պետական և հավաստագրված ոչ պետական բուհերի իրավաբանական ֆակուլտետների բակալավրիատի ավարտական կուրսերի ուսանողների, մագիստրանտների և ասպիրանտների գիտական աշխատանքների մրցույթ ըստ հետևյալ թեմաների՝
• «Մարդու սահմանադրական իրավունքների և ազատությունների պաշտպանության երաշխիքներն ու կառուցակարգերը»
• «Սահմանադրական կարգը, ժողովրդաիշխանությունը, իշխանությունների բաժանման և հավասարակշռման սկզբունքը»
• «Սահմանադրական արդարադատության հիմունքները»։
Մրցույթը մեկնարկում է 2020 թվականի փետրվարի 6-ին՝ Սահմանադրական դատարանի կազմավորման օրը։ Աշխատանքների ներկայացման վերջնաժամկետն է 2020 թվականի մայիսի 15-ը: Արդյունքները կամփոփվեն և կհրապարակվեն 2020 թվականի հուլիսի 5-ին՝ Սահմանադրության ընդունման 25-րդ տարեդարձի օրը:
Աշխատանքները պետք է համապատասխանեն հետևյալ պահանջներին։
• ներկայացվեն հայերեն:
• պատրաստվեն A4 ձևաչափի թղթի վրա՝ միակողմանի տպված:
• տարածքը՝ վերևից- 2 սմ, ներքևից- 2 սմ, ձախից- 2 սմ, աջից- 2 սմ:
• տառատեսակը՝ GHEA Grapalat:
• տողերի միջև հեռավորությունը՝ 1.5 սմ:
• տառաչափը՝ 12:
• հոդվածի առաջին էջը պետք է ներառի՝ հոդվածի վերնագիրը /ցանկալի է, որ վերնագրի առավելագույն երկարությունը չգերազանցի 10 բառը/, ամփոփումը՝ 5-10 նախադասություն, հոդվածի 5-10 հանգուցային բառեր և արտահայտություններ:
• Սկզբում տրվում են հոդվածի հեղինակի անունը, ազգանունը, զբաղեցրած պաշտոնը, կոչումը և գիտական աստիճանը:
Հեղինակի անունը, ազգանունը լինում են թերթի մեջտեղում՝ հոդվածի վերնագրից առաջ, գլխատառ /հաստ/ Bold/, զբաղեցրած պաշտոնները, կոչումները և գիտական աստիճանները՝ փոքրատառ:
Յուրաքանչյուր խմբի (բակալավրեր, մագիստրանտներ, ասպիրանտներ) լավագույն աշխատանքների հեղինակներին կտրվեն պարգևավճարներ.
I տեղ՝ 75.000 դրամ – (3 աշխ.),
II տեղ՝ 50.000 դրամ- (3 աշխ.),
III. տեղ՝ 25.000 դրամ- (3 աշխ.):
Յուրաքանչյուր խմբի լավագույն ճանաչված 5-ական աշխատանքները կհրապարակվեն Սահմանադրական դատարանի տեղեկագրում:
