Ճանապարհային ոստիկանությունը շարունակում է ուժեղացված ծառայությունները:
Մարտի 28-ի երեկոյան ճանապարհային ոստիկանությունը ուժեղացված ծառայություն իրականացրեց մայրաքաղաքում:
Այս մասին տեղեկանում ենք ոստիկանությունից:
Արդյունքում՝ ճանապարհային ոստիկանության պահպանվող հատուկ տարածք տեղափոխվեց 9 մեքենա, որոնցից մեկի վարորդը ոչ սթափ վիճակում էր, երեքը չունեին համապատասխան փաստաթղթեր, մեկ մեքենայի համարանիշը փոխված էր, իսկ մնացածը՝ այլ խախտումների համար:
Ուժեղացված ծառայության ընթացքում հայտնաբերվեցին նաև վեց մեքենայի վարորդներ, որոնք վարում էին ժամկետնանց ԱՊՊԱ պայմանագրով:
Ճանապարհային ոստիկանների ուշադրության կենտրոնում էին նաև միտումնավոր խախտումներ կատարող, երթևեկության մյուս մասնակիցների նկատմամբ բացահայտ անհարգալից վերաբերմունք դրսևորող վարորդներն ու նրանց մեքենաները: Հայտնաբերվեցին նման երկու վարորդ, որոնց մեքենաները տեղափոխվեցին ճանապարհային ոստիկանության պահպանվող հատուկ տարածք:
Հայտնաբերվեց նաև համարանիշը տարբեր եղանակներով ծածկած երկու մեքենա:
Բոլոր օրինախախտ վարորդների նկատմամբ կազմվեցին վարչական իրավախախտման վերաբերյալ արձանագրություններ: Ներողամտություն չցուցաբերվեց ոչ մեկի նկատմամբ:
Հարգելի վարորդնե՛ր, պահպանեք երթևեկության կանոնները և մի խախտեք օրենքը: Ճանապարհային ոստիկանության ուժեղացված ծառայությունները պարբերական են:
