Փաստաբան Լիպարիտ Սիմոնյանը Իրավաբան.net-ին պատմել է իր տարվա հաջողությունների, Ձմեռ պապիկից խնդրած նվերի և տոնական օրերի կրճատման մասին:
-2018 թվականը ի՞նչ փոխեց Ձեր կյանքում և հայաստանյան իրականությունում: Արդյո՞ք հաջողված տարի էր այն:
-Ամենակարևորը՝ ծնվեց երրորդ երեխաս՝ Հայկը, և, բնականաբար, միայն այդ հանգամանաքը բավարար է, որ տարին համարեմ հաջողված: Ինչ վերաբերում է հայաստանյան իրականությունում, ապա անկախ նրանից, սպասելիքները որքան կարդարանան կամ չեն արդարանա, դա տեղի ունեցած քաղաքական փոփոխություններն են:
-Այդ տարվա հատկապես ո՞ր դատական գործերը կամ դատական ակտերը կառանձնացնեք և ինչու՞:
-Առաջնահերթ կառանձնացնեմ դեկտեմբերի 6-ին եվրոպական դատարանի կողմից կայացված վճիռը: Եվրադատարանը Մարտիրոսյան եղբայրների գործով ներկայացված իմ բողոքը բավարարեց՝ ճանաչելով նրանց արդար դատաքննության իրավունքի խախտումը: Բացի այդ, ՀՀ դատական ատյանների գործով կայացված դատական ակտերից կառանձնացնեի՝ իրավապաշտպան Մարինա Պողոսյանի նկատմամբ կայացված արդարացման դատավճիռը:
-Քննարկվում է անցումային արդարադատություն իրականացնելու հարցը: Հետաքրքրական է հատկապես պետական և քաղաքական գործիչների զտման կամ վեթթինգի և լյուստարացիայի մեխանիզմները: Ի՞նչ կարծիք ունեք դրա մասին:
-Ես իրականում չեմ պատկերացնում անցումային արդարադատությունը իրականացնելու իմաստը, ինչ արտակարգ դատարաններ պետք է ստեղծվեն, թե այդ անցումային արդարադատությունն ինչ կանոններով պետք է շարժվի, ինձ համար լրիվ անհասկանալի է: Կարծում եմ, առավել կարևոր է առկա դատական համակարգի անկախության ապահովումն ու կոռուպցիոն դրսևորումների բացառումը:
-Ի՞նչ կխնդրեք Ձմեռ պապիկից՝ Հայաստանում արդարադատության ոլորտի և անձնապես Ձեզ համար:
-Կխնդրեի, որ բացառվեին պատերազմները, արդարադատության ոլորտի համար կխնդրեի, որ որևէ անմեղ անձ չդատապարտվեր, իսկ ինձ համար որպեսզի ծնողներս և երեխաներս առողջ լինեն:
-Ամանորի տոնական օրերն այս տարի չկրճատվեցին: Արդյո՞ք ճիշտ վարվեց նոր կառավարությունը տոնական 3 օր սահմանելու նախագիծը մերժելով:
-Կարծում եմ ՝ այո, այդ որոշման չընդունելը ճիշտ էր, կարելի է մի փոքր հանգստանալ:
-Այս օրերին փորձում եք օգնել Ձեր կնոջը՝ տնային գործերում, թե՞ դրանք միայն կնոջ գործն են:
-Բնականաբար, ոչ, չեմ օգնում, քանի որ աշխատում եմ, չեմ կարող:
-Ի՞նչ ակնկալիքներ ունեք 2019-ից:
-Նույնը, ինչ խնդրել եմ Ձմեռ պապիկից:
