ՀՀ քննչական կոմիտեի ԵՔՔՎ Արաբկիր վարչական շրջանների քննչական բաժնում քննություն է տարվում՝ 23-ամյա երիտասարդին առեւանգելու հանգամանքները պարզելու ուղղությամբ: Ձերբակալվել է չորս անձ:
2018 թվականի դեկտեմբերի 15-ին՝ ժամը 15:00-ին, Երեւան քաղաքի բնակիչը՝ ծնված 1995 թվականին, ՀՀ ոստիկանության ԵՔՎ Արաբկիրի բաժնում հաղորդում է տվել այն մասին, որ 2018 թվականի դեկտեմբերի 12-ին՝ ժամը 23:30-ի սահմաններում, իրեն ծանոթ անձինք, իր կամքին հակառակ, բռնություն գործադրելով, առեւանգել են իրեն՝ նստեցնելով «Մերսեդես» մակնիշի ավտոմեքենան, տեղափոխել են ինչ-որ առանձնատուն, պահել այնտեղ եւ մոտ 8 անհայտ անձանց հետ ծեծի ենթարկել:
Ըստ երիտասարդի հաղորդման՝ այդ ընթացքում ներկա գտնվողներից մեկն ատրճանակով, իսկ մյուսը դանակով սպանության սպառնալիքներ են տվել, հայհոյել, դանակով վնասել աջ ձեռքի դաստակը:
Դեպքի առթիվ 2018 թվականի դեկտեմբերի 15-ին ՀՀ ոստիկանության ԵՔՎ Արաբկիրի բաժնում հարուցվել է քրեական գործ՝ ՀՀ քրեական օրենսգրքի 131-րդ հոդվածի 2-րդ մասի 1-ին կետով (մի խումբ անձանց կողմից նախնական համաձայնությամբ մարդուն առեւանգելը), որը նույն օրն ստացվել է Արաբկիր վարչական շրջանի քննչական բաժնում եւ ընդունվել է վարույթ: 23-ամյա երիտասարդը ճանաչվել է տուժող եւ ցուցմունք տվել դեպքի շուրջ:
Ձեռնարկված անհետաձգելի քննչական եւ օպերատիվ հատախուզական միջոցառումների արդյունքում պարզվել են դեպքի մի շարք հանգամանքներ՝ շարժառիթը, դեպքի վայրը, առերեւույթ հանցագործություն կատարած անձանցից 4-ի ինքնությունը, ովքեր հանդիսանում են Երեւան քաղաքի բնակիչներ: Վերջիններս ձերբակալվել են՝ 23-ամյա երիտասարդին առեւանգելու կասկածանքով:
Տուժող երիտասարդի մասնակցությամբ կատարվել է դեպքի վայրի զննություն, որի ժամանակ նա մատնանշել է այն տեղը, որտեղից իրեն առեւանգել են: Կատարվել է առերես հարցաքննություն:
Քրեական գործով էական նշանակություն ունեցող հանգամանքներ պարզելու համար նշանակվել է դատաբժշկական փորձաքննություն:
Ձեռնարկվում են անհրաժեշտ քննչական եւ օպերատիվ հետախուզական միջոցառումներ՝ միջադեպին մասնակից անձանց շրջանակը պարզելու, ցուցմունքներում մատնանշված հանգամանքներն ստուգելու ուղղությամբ:
Հանձանարարություն է տրվել Ոստիկանության համապատասխան ստորաբաժանմանը՝ նրանց հայտնաբերելու եւ վարույթն իրականացնող մարմնին ներկայացնելու ուղղությամբ:
Նախաքննությունը շարունակվում է:
