Ազգային ժողովի պատգամավոր Մանվել Գրիգորյանի խափանման միջոց կալանքը երկու ամսով երկարացվել է:
Այս մասին հայտնեց նրա պաշտպան Արսեն Մկրտչյանը:
Հայտնի է, որ նախաքննական մարմինը կալանքի ժամկետը երկարացնելու միջնորդություն է ներկայացրել դատարան, որն էլ բավարարել է այդ միջնորդությունը:
Նշենք, որ արդեն երրորդ անգամ է, որ նրա կալանքի ժամկետը երկարաձգվում է:
Մանվել Գրիգորյանն առողջական վատ վիճակի պատճառով նիստին ներկա չի գտնվել, քանի որ դեռ երեկ ինքնազգացողության վատթարացման հետ կապված շտապօգնության մեքենա էր հրավիրվել դատարան:
Հիշեցնենք, որ ԱԱԾ-ի կողմից իրականացված օպերատիվ-հետախուզական միջոցառումների արդյունքում տվյալներ են ստացվել այն մասին, որ ՀՀ ԱԺ պատգամավոր, ԵԿՄ նախագահ Մանվել Գրիգորյանը այլ անձանց հետ նախնական համաձայնությամբ ապօրինի կերպով ձեռք է բերել և պահում է զենք և ռազմամթերք:Դեպքի առթիվ ՀՀ ԱԱԾ քննչական վարչությունում հարուցվել է քրեական գործ ` ՀՀ քրեական օրենսգրքի 235-րդ հոդվածի 2-րդ մասի հատկանիշներով: Գործի շրջանակներում խուզարկություններ են իրականացվել Մանվել Գրիգորյանի տանը, ամառանոցում և նրան պատկանող այլ տարածքներում: Հայտնաբերվել է ապօրինի կերպով պահվող մեծ թվով զենք և ռազմամթերք:
ԱԺ պատգամավոր Մանվել Գրիգորյանը բերման է ենթարկվել և ձերբակալվել` ՀՀ քրեական օրենսգրքի 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով: Հայաստանի Հանրապետության Սահմանադրության 96-րդ հոդվածով սահմանված կարգով, ԱԺ պատգամավորին ազատությունից զրկելու մասին անհապաղ տեղեկացվել է ՀՀ ԱԺ նախագահը:
