2018թ. ապրիլի 13-ին ՀՀ ոստիկանության Երևան քաղաքի վարչությունում և Կենտրոնականի բաժնում ստացված ահազանգերի համաձայն՝ մուտքի դուռը վնասելով Երևանի պետական համալսարան են ներխուժել ՀՀ Ազգային ժողովի պատգամավոր Ն.Փաշինյանի գլխավորած հավաքի մի խումբ մասնակիցներ և դռները վնասելով փորձել են մտնել Համալսարանի ռեկտորի աշխատասենյակ: Այդ ընթացքում հավաքի մասնակիցների կողմից մարմնական վնասվածքներ են պատճառվել Համալսարանի անվտանգության ծառայության երկու աշխատակիցների: Տևական ժամանակ գտնվելով ԵՊՀ շենքում՝ հավաքի մասնակիցներն իրենց գործողություններով խախտել են Համալսարանի բնականոն գործունեությունը:
Այս մասին տեղեկանում ենք ՀՀ դատախազության հանրային կապերի բաժնից:
Իսկ 2018թ. ապրիլի 14-ին ՀՀ ոստիկանության Երևան քաղաքի վարչության Կենտրոնականի բաժնում ստացված հաղորդման համաձայն՝ ՀՀ Ազգային ժողովի պատգամավոր Ն. Փաշինյանը հավաքի մի խումբ մասնակիցների հետ միասին, շենքի պահպանությունն իրականացնող ոստիկանության ծառայողի դիմադրությունը հաղթահարելով, մուտք են գործել պետական պահպանության ենթակա ռազմավարական օբյեկտ հանդիսացող և ՀՀ ոստիկանության պահպանության ներքո գտնվող «Հայաստանի հանրային ռադիո» ՓԲ ընկերության շենք: Այդ ընթացքում հավաքի մասնակիցները, վնասելով գույքը, փակ վիճակում գտնվող դուռը կոտրելով, մտել են ընկերության սենյակներից մեկը: Ոստիկանության ծառայողը Ն. Փաշինյանից պահանջել է հավաքի մասնակիցներին դուրս բերել շենքից և ազատել զավթված շենքը: Սակայն հավաքի կազմակերպիչը չի կատարել պահանջը, ինչպես նաև ոստիկանության ծառայողի օրինական պահանջը չի փոխանցել հավաքի մասնակիցներին՝ դրանով չկատարելով հավաքի բնականոն ընթացքն ապահովելու՝ «Հավաքների ազատության մասին» ՀՀ օրենքով սահմանված իր պարտականությունը: Ներխուժած անձինք իրենց գործողություններով խոչընդոտել են ընկերության բնականոն գործունեությունը, իսկ Ն. Փաշինյանը, պահելով շենքը, իրեն ուղիղ եթեր տրամադրելու պահանջ է ներկայացրել:
ՀՀ գլխավոր դատախազության կողմից հանձնարարվել է ՀՀ ոստիկանությանը՝ վերը նշված երկու դեպքերի առթիվ ՀՀ քրեական դատավարության օրենսգրքի 180-181-րդ հոդվածներով նախատեսված կարգով նախապատրաստել նյութեր՝ քրեական գործ հարուցելու հիմքերի առկայությունն ստուգելու նպատակով:
Հիշեցնենք, որ այսօր ժամեր շարունակ Ֆրանսիայի հրապարակը փակ պահելուց հետո ԱԺ պատգամավոր Նիկոլ Փաշինյանը առաջարկեց, որ քանի դեռ ցեեկային ժամ է, հանրահավաքի ժամ չէ, երթ կանեն, ցույց տալու իրենց հզորությունը, միասնությունը. «Կվերադառնանք այստեղ, 16.30-ին կհասկանանք, թե որտեղ են ՀՀԿ-ականները, որ շրջափակենք»:
Երթի կեսից «Քաղաքացիական պայմանագիր» կուսակցության առաջնորդ, «Ելք» խմբակցության ղեկավար Նիկոլ Փաշինյանը և մի շարք քաղաքացիների ուղեկցությամբ մտել են Հայաստանի հանրային ռադիոյի շենք:
«Ես կարծում եմ, որ մենք այս գործողությամբ անհարմարություն ենք ձեզ պատճառում: Ես ներողություն եմ խնդրում հանրային ռադիոյի բոլոր աշխատակիցներից»,-ասաց Նիկոլ Փաշինյանը:
Փաշինյանը Հանրային ռադիոյից ուղիղ եթեր էր խնդրում՝ ուղերձ հղելու համար, սակայն նրան այդ պահին ուղիղ եթեր չտրամադրեցին, իսկ շենքում էլեկտրականությունն անջատվել էր, նա մի քանի րոպե ժամանկ խնդրեց ներկա լրագրողներից՝ իր ուղարձը պատրաստելու և նրանց ներկայացնելու համար:
