2019 թ.-ին Երևանի պետական համալսարանը կբոլորի հիմնադրման 100-րդ տարին: Մեկդարյա հոբելյանին նվիրված միջոցառումների շրջանակում Կենտրոնական բանկը 2019 թ.-ին նախատեսում է թողարկել «ԵՊՀ հիմնադրման 100-ամյակ» հուշադրամներ:
Հուշադրամի էսքիզների դիմերեսի վրա պարտադիր հայերեն լեզվով պետք է նշված լինի «Հայաստանի Հանրապետության կենտրոնական բանկ» գրառումը, «1000 դրամ» (անվանական արժեքը) և թողարկման տարեթիվը՝ «2019»: Դարձերեսի պարտադիր տարրեր չկան:
Նշենք, որ հոբելյանական հուշադրամի ձևը կլոր է, տրամագիծը` 40,0 մմ: Էսքիզները կարող են ունենալ նաև գունային լուծումներ:
Մրցութային ընտրությունը կատարելու ժամանակ հնարավոր է, որ լավագույն ճանաչված էսքիզները (հուշադրամի դիմերեսի կամ դարձերեսի համար) կատարված լինեն տարբեր հեղինակների կողմից:
Մրցութային հայտերի ընդունման վերջնաժամկետը 2018 թ.-ի փետրվարի 1-ն է: Հայտերի բացումը կիրականացվի փետրվարի 6-ին, իսկ արդյունքները կամփոփվեն փետրվարի 13-ին:
Հրապարակային մրցույթին կարող են մասնակցել բոլոր ցանկացողները:
Հավելենք նաև, որ լավագույն ճանաչված յուրաքանչյուր կողմի (դիմերես կամ դարձերես) էսքիզի համար սահմանվում է 150.000 ՀՀ դրամ մրցանակային գումար:
Մրցույթի վերաբերյալ մանրամասն տեղեկատվություն կարելի է ստանալ ՀՀ ԿԲ պաշտոնական կայքից՝ www.cba.am: Հրապարակային մրցույթի մանրամասները տեղադրված են նաև ԵՊՀ պորտալի «Օրացույց» կայքում:
