ՀՀ աշխատանքի և սոցիալական հարցերի նախարար Արտեմ Ասատրյանը փետրվարի 3-ին հանդիպել է  ՀՀ սոցիալական ապահովության պետական ծառայության աշխատակազմի 51 տարածքային բաժինների պետերի հետ: Հայտնում են նախարարությունից:

Խոսելով  վերջին տարիների ընթացքում ոլորտում իրականացված  աշխատանքների, լրջագույն փոփոխությունների և ձեռքբերումներ մասին՝  նախարարը  նշել է, որ   չնայած կենսաթոշակային ոլորտի  բազմաթիվ խնդիրներ լուծված են, սակայն անելիքները ևս դեռ շատ են:

«Պետք է փաստենք, որ  դեռևս չլուծված է կենսաթոշակային ստաժների  ճշգրտման և հաշվառման  խնդիրը: Այս տարվա մեր հիմնական աշխատանքներնն ուղղված են լինելու  հենց այդ խնդրի լուծմանը: Որոշակի ժամանակահատվածի համար տեղեկատվական շտեմարանների բացակայությունը այսօր մեծ ռիսկեր  են առաջացրել, որի հաղթահարման միակ միջոցը  համակարգային լուծումներով առաջնորդվելն է»,-ասել է նախարարը:

«Ժամանակը սեղմ է, պետք է օր առաջ ամբողջական լուծում տրվի այս հարցին»-ընդգծել է նախարարը՝ լուծման գործում կարևորելով Ծառայության տարածքային բաժինների աշխատակիցների անմնացորդ նվիրումը:

Անդրադառնալով քաղաքացիների հետ շփմանը՝ նախարարը խստագույնս հորդորել է ճիշտ վերաբերմունք  և մոտեցում ցուցաբերել  յուրաքանչյուր քաղաքացու  խնդրի նկատմամբ:
«Քաղաքացիների հետ աշխատանքում, նրանց հետ շփումներում ձեր ցանկացած բացթողում և թերացում քննարկման առարկա չի դառնալու, այլ կայացվելու են համապատասխան որոշումներ»,-շեշտել  է նախարարը:

Հանդիպման ընթացքում նախարարը  մեկ անգամ  ևս անդրադարձել է այն հանագամանքին, որ անձնական, ֆինանսական պատասխանատվություն են կրելու այն պաշտոնատար անձինք, ովքեր անհիմն տեղեկատվության հիման վրա կնշանակեն կենսաթոշակներ կամ այլ դրամական վճարումներ:

Այնուհետև քննարկվել են  Ազգային արխիվի հետ տեղեկատվության փոխանակման համակարգի հետ կապված հարցեր, ինչպես նաև  տարածքային բաժինների ներկայացուցիչների  կողմից բարձրացված այլ խնդիրներ:

Հիշեցնենք, որ արդեն մեկնարկել են աշխատանքային ստաժների գույքագրման աշխատանքները, որի արդյունքում նախատեսվում է «Էլ. Կենսաթոշակ» համակարգում թվային տեղեկատվության տեսքով հաշվառել քաղաքացիների աշխատանքային ստաժները:

Համակարգը  հնարավորություն կտա խուսափել կեղծարարությունից և բացառել կեղծ ստաժների տեղեկատվության հիման վրա կենսաթոշակների նշանակման դեպքերը: Ի լրումն վերոգրյալի` ստաժների գույքագրման աշխատանքները նախատեսվում է ավարտել աշխատանքային գրքույկների թվայնացումից հետո: Այդ աշխատանքների իրականացումը հնարավորություն կտա բարձրացնել ոլորտին հատկացված միջոցների օգտագործման արդյունավետությունը և հասցեականությունը` էական խնայողություն ապահովելով պետական բյուջեյում:

Նշենք, որ  մինչ նախարարի հետ հանդիպումը սկսվելը տարածքային բաժնի պետերը մասնակցել են ՀՀ սոցիալական ապահովության ծառայության ղեկավար կազմի կողմից նախաձեռնած դասընթացին, որը վերաբերել է  Նախարարի և Ծառայության պետի հրամաններին՝ ուղղված  կենսաթոշակների նշանակման, հաշվարկի և վերահաշվարկի դեպքերում աշխատանքային ստաժի հաշվառման արդյունավետության բարձրացմանը:

Իրավաբան.net