Դատական ակտերի հարկադիր կատարաման (ԴԱՀԿ) աշխատակիցներ 39-ամյա Գագիկ Հովհաննիսյանը և 43-ամյա Կարեն Միլիտոնյանը ամբաստանյալի աթոռին են իրենց աշխատանքային պարտականությունները ոչ պատշաճ կատարելու հետևանքով պետական օրինական շահերին էական վնաս պատճառվելու համար:
Գագիկ Հովհաննիսյանը եղել է մշտապես իշխանության ներկայացուցչի գործառույթներ իրականացնող պաշտոնակատար անձ՝ զբաղեցնելով ՀՀ ԱՆ ԴԱՀԿ ապահովող ծառայության հարկադիր կատարման օպերատիվ բաժնի պետի տեղակալի պաշտոնը: Իսկ Կարեն Միլիտոնյանը եղել է ՀՀ ԱՆ ԴԱՀԿ ապահովող ծառայության հարկադիր կատարման օպերատիվ բաժնի գլխավոր խորհրդատու:
Համաձայն մեղադրական եզրակացության՝ նրանք, ի պաշտոնե լիազորված լինելով ապահովելու «ԴԱՀԿ մասին» օրենքով նախատեսված դատական ակտերի հարկադիր կատարումը, ծառայության նկատմամբ դրսևորել են անփույթ և անբարեխիղճ վերաբերմունք, իրենց աշխատանքային պարատականությունները կատարել են ոչ պատշաճ, որով էական վնաս է պատճառվել պետության օրինական շահերին` հեղինակազրկվել են ՀՀ ԱՆ ԴԱՀԿ ապահովող ծառայությունը և ՀՀ դատական իշխանությունը:
Գործը քննվում է Էրեբունի և Նուբարաշեն վարչական շրջանների ընդհանուր իրավասության դատարանում՝ դատավոր Վարդան Գրիգորյանի նախագահությամբ:
Ամբաստանյալների նկատմամբ որպես խափանման միջոց ընտրվել է ստորագրությունը՝ չհեռանալու մասին:
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
