Փաստաբան Վաղինակ Աթոյանին մեղադրանք է առաջադրվել խոշոր չափերով կաշառք տալու փորձի համար: Այս մասին տեղեկանում ենք «Դատալեքս» դատական տեղեկատվական համակարգից:
Գործը քննվելու է Շենգավիթ վարչական շրջանի ընդհանուր իրավասության դատարանում, դատավոր Նելլի Բաղդասարյանի նախագահությամբ:
Վաղինակ Աթոյանի պաշտպանյալի նկատմամբ Վերաքննիչ դատարանը նշանակված 3 տարի ժամկետով ազատազրկման ձևով պատիժը բեկանել է և նշանակել է ավելի մեղմ պատիժ` 2 տարի ժամկետով ազատազրկում:
Օգտվելով ստեղծված բարենպաստ պայմաններից` դատարանի հիշյալ որոշմամբ կատարված դրական փոփոխություններն իրեն վերագրելու և դատական ակտը կայացրած դատավորների կողմից իբր կաշառք ստանալու շուրջ պայմանավորվածություն ձեռք բերելու մասին մտացածին իրադարձությունների միջոցով անձի վստահությունը չարաշահելու եղանակով, խաբեությամբ Վ.Աթոյանը ՀՀ ԱՆ «Նուբարաշեն» ՔԿ հիմնարկում տեսակցել է Մ. Մանուկյանին:
Վաղինակ Աթոյանը ինչպես նրան, այնպես էլ հետագայում նրա քրոջը` Սե. Մանուկյանին, իրականությանը չհամապատասխանող տեղեկություններով հավաստիացրել է, թե իբր դատավորները Մ.Մանուկյանի օգտին գործողությունները կատարել են կաշառքի դիմաց, ապա` համոզելու եղանակով դրդել է տալ կաշառքի առարկա հանդիսացող 470.000 ՀՀ դրամը, ինչի կապակցությամբ Մ. և Ս. Մանուկյանները տվել են իրենց համաձայնությունը:
Այս քայլով Վաղինակ Աթոյանը դրդել է նաև իր պաշտպանյաին և նրա քրոջը կատարել հանցանք` տալ խոշոր չափերով կաշառք:
Այնուհետև` Վ.Աթոյանը «Նաիրիտ» գործարանի հարակից տարածքում Սեդա Մանուկյանից անձամբ ստացել է հիշյալ 470.000 ՀՀ դրամը:
Մ. Մանուկյանին և նրա քրոջը՝ Ս. Մանուկյանին մեղադրանք է առաջադրվել այն բանի համար, որ նա, նախնական համաձայնության գալով եղբոր` Մանուկ Մանուկյանի հետ, փորձել է խոշոր չափերով կաշառք տալ դատական իշխանության ղեկավար աշխատող պաշտոնատար անձանց` եղբոր օգտին որոշակի գործողություններ կատարելու դիմաց, սակայն հանցագործությունն ավարտին չի հասցվել իր կամքից անկախ հանգամանքներով:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
