Լիպարիտ Սիմոնյանի խոսքով` այս քրեական գործի մեղադրական եզրակացությունից պարզ է դառնում, որ Ա․Ա․-ին առաջադրված մեղադրանքը հիմնված է միայն հանգուցյալ Արտաշես Գալուստյանի ցուցմունքի հիման վրա, իսկ մեղադրանքի հիմքում դրված մյուս նյութերը, որոնք կոչված են հիմնավորելու վերջինիս ցուցմունքը` կրում են ֆակուլտատիվ բնույթ և հակասում են Գալուստյանի ցուցմունքներին:
Պաշտպանական կողմի միջնոդությունը բավարարելով` առաջին ատյանի դատարանը որոշում է կայացրել որպես մեղադրյալ հարցաքննված Արտաշես Գալուստյանի նախաքննական ցումունքը և Ա․Ա․-ի հետ առերես հարցաքննության արձանագրությունը հանել մեղադրանքի հիմքից՝ համարելով անթույլատրելի ապացույց:
«Այս քրեական գործի դատավճռով վկայակոչված, իբրև ամբաստանյալի մեղքը հիմնավորող դատարանի ենթադրությունները, ամբողջությամբ բխում են դատարանի կողմից անթույլատրելի ճանաչված ապացույցներից: Դրանք չեն կարող դրվել մեղադրանքի հիմքում: Դատարանի կողմից դատավճռում Ա․Ա․-ի մեղքը հաստատված լինելու մասին մյուս պատճառաբանությունները զուտ ենթադրության արդյունքներ են, և դրանք չեն բխում գործով հետազոտված ապացույցներից, դրանցով դատարանը կարծես թե անմեղության ապացուցման բեռը դրել էր պաշտապանության կողմի վրա»,- նկատեց փաստաբանը:
Ըստ նրա `եթե հաստատված չէ այն փաստը , որ Ա․Ա․-ն տեղյակ է եղել կատարվելիք գողության մասին, ինչպես նաև հաստատված չէ, որ որևէ տեղեկություն է տվել հանցագործության կատարումը թույլ տալու համար, ապա դատարանի արած հետևությունները չեն կարող հիմք լինել մեղադրական դատավճիռ կայացնելու համար:
«Արտաշես Գալուստյանը ձերբակալվելուց հետո տվել է ինքնախոստովանական ցուցմունքներ, սակայն դրանցից որևէ մեկում Ա․Ա․-ի կողմից իրենց տեղեկություններ տրամադրելու մասին չի խոսել: Ավելին ասել է. « Ինձանից ու Էդգարից բացի ոչ մեկ դրա մասին չի իմացել»»:
Լիպարիտ Սիմոնյանը դատարանի ուշադրությունը հրավիրեց այն հանգամանքի վրա, Ա․Ա․-ի դեմ Արտաշես Գալուստյանը իրականությանը չհամապատասխանող ցուցմունքներ է տվել` ազատություն ստանալու նպատակով: Վերջինիս հետ «Նուբարաշեն» ՔԿՀ-ի նույն խցում պահվել է նաև Տիգրան Առաքելյանը:
«Իմ ասածի մասին է վկայում նաև դատաքննության ընթացքում հարցաքննված Տիգրան Առաքելյանի ցուցմունքը: Վերջինս դատարանին է հայտնել, որ Արտաշես Գալուստյանը ազատվելու նախորդ օրը և այդ օրը հստակ ասում էր, որ ինքը տուն է գնալու, իր խափանման միջոցը փոխելու են: Նույնիսկ նշել է, որ ուզում են, որ ինքը երրորդ անձի դեմ իրականությանը չհամապատասխանող ցուցմունք տա, որից հետո նոր իր խափանման միջոցը կփոխեն: Այս խոսակցության հաջորդ օրը հսկիչը եկել է և տարել է Գալուստյանին, որից հետո այլևս չի վերադարձել: Հատկանշական է, որ Տիգրան Առաքելյանն այս ցուցմունքը տվել է ոչ այս գործի շրջանակներում, այլ Երևան քաղաքի քննչական վարչությունում քննվող Պետրոս Գալուստովին և Արատշես Գալուստյանին ինքնասպանության հասցնելու քրեական գործի շրջանակներում: Միայն դրանից հետո է նա այս գործով հարցաքննվել առաջին ատյանի դատարանում»:
Տիգրան Առաքելյանի տված ցուցմունքը հաստատել են նաև նույն խցում գտնվող Հայկ Թադևոսյանը և Անդրեյ Մազիևը: Նրանց ցուցմունքները ևս ուսումնասիրվել են դատարանում` կցված են Պետրոս Գալուստովին և Արատշես Գալստյանին ինքնասպանության հասցնելու քրեական գործին:
Նախաքննության ժամանակ, երբ պաշտպանական կողմը վիճարկել է Ա․Ա․-ի նկատմամբ խափանման միջոցի հարցը, քննիչը և մեղադրողը հայտնել են, որ հանցագործությանը մասնակից այլ անձինք էլ կան, որոնց ինքնությունը պարզված չէ:
«Այդ դեպքում հարց է առաջանում, թե այդ ինչպե՞ս է Արատշես Գալուստյանը օժանդակել հանցագործության բացահայտմանը և մերկացրել հանցագործության մասնակիցներին, եթե դեռևս ինքնությունը չբացահայտված այլ մարդիկ էլ կային»,-ասաց Լիպարիտ Սիմոնյանը:
Նա չբացառեց այն հանգամանքը, որ կարող էին լինել նման մարդիկ, հաշվի առնելով նաև այն, որ նրանցից մեկի փոխարեն արդեն 2 տարի է ակնհայտ անհիմն մեղադրանքով կալանքի տակ է պահվում Ա․Ա․-ն:
Դատական նիստը հետաձգվեց`նշանակվելով օգոստոսի 11-ին:
Արև Ավագյան
