Իսրայելական զինվորականները Գազայի հատվածում շարունակում են կատաղի մարտեր վարել պաղեստինյան արմատական ՀԱՄԱՍ կազմակերպության զինված կողմնակիցների դեմ։ Վերջին ժամերի ընթացքում սպանվել է ավելի քան 130 արմատական, հաղորդում է բանակի մամուլի ծառայությունը։
«Վերջին մի քանի ժամվա ընթացքում սպանվել է ավելի քան 130 ահաբեկիչ: Իսրայելի պաշտպանության ուժերը Գազայի հատվածում ցամաքային գործողության ընթացքում ոչնչացնում են ահաբեկիչների ենթակառուցվածքը», – ասվում է տեքստում:
Ինչպես ընդգծվում է հայտարարության մեջ, Իսրայելի պաշտպանության բանակի զինվորները «շարունակում են կատաղի մարտեր վարել ՀԱՄԱՍ-ի ահաբեկիչների հետ Գազայի հատվածում՝ միաժամանակ հայտնաբերելով մեծ քանակությամբ զենք և ոչնչացնելով ահաբեկիչների ենթակառուցվածքը ՀԱՄԱՍ-ի ռազմակայանների մոտ»:
Բացի այդ, զինվորականները հայտնել են, որ Իսրայելի ռազմաօդային ուժերի ինքնաթիռները հարվածներ են հասցրել մի քանի ռազմական շտաբների, որոնք օգտագործվում էին ՀԱՄԱՍ-ի հրամանատարների կողմից ռազմական գործողությունները վերահսկելու համար: Ցամաքային ստորաբաժանումներին աջակցում է Իսրայելի ռազմածովային նավատորմը, և հրթիռային նավը հարվածել է ՀԱՄԱՍ-ի դիտակետերին, հայտնել են բանակի մամուլի ծառայությունից:
