Երեք առանցքային սկզբունք կա, որոնց շուրջ եթե Բաքուն համաձայնվի, խաղաղության պայմանագիրը Ադրբեջանի հետ կստորագրվի։ Այսօր՝ հոկտեմբերի 4-ին, ՀՀ ԱԺ–ում կառավարության հետ հարցուպատասխանի ժամանակ հայտարարել է ՀՀ վարչապետ Նիկոլ Փաշինյանը՝ պատասխանելով պատգամավոր Սիսակ Գաբրիելյանի այն հարցին, թե արդյոք Գրանադայում հանդիպումից Ալիևի հրաժարվելու պատճառն իսկապես հանդիպման ձևաչափն է կամ միջնորդները։

«Ամեն դեպքում կարծում եմ՝ այսօր կարևոր խնդիր է, որ մենք կարողանանք այնպես անել, որ խաղաղ գործընթացը շարունակվի և շարունակվի մի քանի առանցքային սկզբունքների հիման վրա։ Այդ սկզբունքների մեջ ոչ մի նոր բան չկա, դրա մասին գիտեն բոլորը»,– հայտարարեց Փաշինյանը:

Նա ընդգծել է, որ այդ սկզբունքները արձանագրված են 2023 թ․ հուլիսի 15-ի Բրյուսելում տեղի ունեցած հանդիպմանը հետևած հայտարարության մեջ, որն արել է Շառլ Միշելը։ Դրանք հետևյալն են՝  երկու երկրները՝ Հայաստանն ու Ադրբեջանը, ճանաչում են միմյանց տարածքային ամբողջականությունն այն ըմբռնմամբ, որ ՀՀ-ի տարածքը 29,800 քկմ է, Ադրբեջանի տարածքը՝ 86,600 քկմ։

«Շատ կարևոր է, որ դելիմիտացիային ընդառաջ որոշում կայացվի և համաձայնություն ձեռք բերվի, թե որ քարտեզների հիման վրա են արվելու դելիմիտացիան ու դեմարկացիան։ Դա պետք է տեղի ունենա 1975 թ. քարտեզների հիման վրա, բայց սկզբունքորեն այնպես չէ, որ մեր դիրքորոշումն այդ հարցում շատ կարծր է»,– նշել է վարչապետը։