Այսօր՝ օգոստոսի 7-ին ասորի ժողովրդի ցեղասպանության հիշատակի օրն է։ Այս մասին ֆեյսբուքյան իր էջում գրառում է կատարել Ազգային ժողովի պատգամավոր Զեմֆիրա Միրզոևան։
«Առաջին համաշխարհային պատերազմի ժամանակ Օսմանյան կայսրությունը սկսեց բնաջնջել քրիստոնյա ասորիներին, հայերին և հույներին։
1914-1923 թթ ցեղասպանության զոհ դարձավ ավելի քան 750,000 ասորի,
ինչը զգալիորեն ազդեց ազգի ապագա զարգացման, մշակութային ակտիվ քաղաքականության պահպանման վրա, քանի որ կոտորածը զգալիորեն նվազեցրել էր ասորի բնակչության թվաքանակը:
Օսմանյան կայսրությունում ապրող ասորիների, հայերի և հույների ցեղասպանությունը 20-րդ դարի ամենամեծ աղետներից մեկն է համարվում։
Ասորական բոլոր հասարակական կազմակերպություններն ու եկեղեցին որոշեցին հենց օգոստոսի 7-ին իրենց հարգանքի տուրքը մատուցել ասորի անմեղ զոհերի հիշատակին, որովհետև հենց օգոստոսի 7-ին Հյուսիսային Իրաքում գտնվող Սըմել քաղաքում մեկ օրում ավելի քան 5000 ասորի ենթարկվեցին դաժան սպանությունների և տեղահանումների:
Ցավոք, 1933-ից հետո էլ ասորիներն առ այսօր իրենց պատմական հայրենիքում ենթարկվում են սպիտակ ցեղասպանության: Այսպես, 2014թ. Իսլամական Պետություն կոչվող ահաբեկչական խմբավորումը սկսեց ասորական պատմության ջնջման իրենց սև գործը:
Շատ կարևոր է, որպեսզի միջազգային հանրությունը քայլեր ձեռնարկի ասորիների ցեղասպանության, ինչպես նաև բոլոր քրիստոնյա ազգերի ցեղասպանությունների ընդունման և ճանաչման հարցում։
Միայն մարդկության դեմ կատարված հանցագործությունները դատապարտելով կարող ենք կանխել նոր ցեղասպանություններ»:
