Ընդդիմադիր ՊԱՏԳԱՄԱՎՈՐՆԵՐԸ փորձում են ամեն կերպ արդարացնել, մեղմել երեկ տեղի ունեցած զարհուրելի միջադեպը։ Այս մասին ֆեյսբուքյան իր էջում գրել է ԱԺ պատգամավոր Վահագն Ալեքսանյանը։
«Փորձում են ներկայացնել, թե պապիկները հատուկ կազմակերպված սադրանքի մաս էին, թե վճարված էին, թե ուղղորդված էին։
Այնինչ, կամայական vox pop-ը Գյումրիում ցույց կտա, թե գյումրեցիների քանի տոկոսը ինչ վերաբերմունք իրեն «թուրքի եթիմ» անվանող շարժման նկատմամբ։ Եթե ընդդիմադիր պատգամավորների կարծիքով պիտի գյումրեցիներին այդ անունով դիմեն ու գյումրեցի պապիկներն էլ իրենց ի պատասխան օրհնեին, չեմ կարող ասել, բայց ՑԱՆԿԱՑԱԾ պարագայում տասնյակ առողջ երիտասարդների ձեռնափայտով պապիկ ծեծելն ուղղակի արժեքային համակարգ է։
Կարևոր է, որ ոստիկանությունը շատ օպերատիվ ու կազմակերպված է աշխատում և զազրելի արարքի մասնակիցների մեծ մասն արդեն ձերբակալված է»,-գրել է նա։
Հիշեցնենք, որ միջադեպի վերաբերյալ մայիսի 8-ին ՀՀ ոստիկանության Շիրակի մարզային վարչության աշխատակցի կողմից զեկուցագիր է ներկայացվել այն մասին, որ նույն օրը, քաղաքական ընդդիմության կողմից կազմակերպած ավտոերթի ընթացքում, Գյումրի քաղաքի Երևանյան խճուղում կանգնած քաղաքացիների և հիշյալ ավտոերթի մասնակիցների միջև տեղի է ունեցել վիճաբանություն։
Ձեռնարկված միջոցառումների արդյունքում պարզվել է, որ մի խումբ երիտասարդներ, իջնելով ավտոմեքենայից, մոտեցել են Գյումրու Երևանյան խճուղում գտնվող հասարակական տրանսպորտի կանգառում կանգնած տարեց տղամարդկանց և սկսել հարվածներ հասցնել նրանց մարմնի տարբեր մասերին:
Դեպքի առթիվ ՀՀ ոստիկանության Շիրակի մարզային վարչության Գյումրի քաղաքի Կումայրիի բաժնում ՀՀ քրեական օրենսգրքի 258-րդ հոդվածի 4-րդ մասով հարուցվել է քրեական գործ, որի նախաքննությունն իրականացվում է ՀՀ քննչական կոմիտեի Շիրակի մարզային քննչական վարչությունում:
