ՌԴ պաշտպանության նախարարությունն առաջին անգամ հրապարակել է հատուկ ռազմական գործողության ընթացքում զոհված և ծանր վիրավորված ուկրաինացի զինծառայողների ցուցակը, հայտնում է «ՌԻԱ Նովոստին»։
Ընդհանուր առմամբ, ռազմական գերատեսչության տվյալներով, Ուկրաինայի զինված ուժերի անդառնալի կորուստները կազմում են 23 367 մարդ։
«Ռուսաստանի պաշտպանության նախարարության տրամադրության տակ գտնվող փաստաթղթերը վկայում են նաև մեծ թվով դասալքված զինծառայողների, վիրավորների և անհայտ կորածների մասին»,- ասվում է նախարարության Telegram ալիքում։
«Հրապարակված տվյալները վերաբերում են 3057 զորամասին, որը ներառում է նեոնացիստական Ազովի գունդը, որի զինյալների նկատմամբ Ռուսաստանում քրեական գործեր են հարուցվել։ Ուկրաիներենով կազմված ցուցակներում նշվում են մահացածների ազգանունը, անունը և հայրանունը, կոչումը, պաշտոնը, ծննդյան տարեթիվը, մահվան հանգամանքները և դիակի գտնվելու վայրը կամ վնասվածքի և ախտորոշման բնույթը»,-նշվում է հայտարարության մեջ։
Հրապարակված փաստաթղթերում կա 386 անուն՝ 124 զոհ և 262 վիրավոր։
Ցանկը՝ այստեղ։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
