Հայաստանի Հանրապետության անկախության հռչակումից հետո, նորաստեղծ պետության ներքին գործերի նախարարությունը, գիտակցելով բոլոր դժվարությունները, որոնց կարող են հանդիպել իրավապահ մարմինները դեմոկրատացման և արմատական փոփոխությունների այս բարդ ժամանակաշրջանում, և կարևորելով ոստիկանական միջազգային համագործակցությունը, առաջարկությամբ դիմեց ՀՀ կառավարությանը` Քրեական ոստիկանության միջազգային կազմակերպությանը-Ինտերպոլին ադնդամակցելու վերաբերյալ:

և 1992թ. նոյեմբերին Դակարում կայացած Ինտերպոլի Գլխավոր ասամբլեայի 61-րդ նստաշրջանում Հայաստանն ընդունվեց որպես անդամ-երկիր, իսկ դեկտեմբեր ամսից սկսեց կազմավորվել ՀՀ-ում Ինտերպոլի ԱԿԲ-ն, որը վերջնականորեն ձևավորվեց 1993թ. հունիսին:

Ի՞նչ է ինտերպոլը և ի՞նչ գործառույթներ է այն իրականացնում:

Ինտերպոլը դա քրեական ոստիկանության միջազգային կազմակերպություն է, որի նպատակն է ապահովել և զարգացնել փոխհամագործակցությունը քրեական ոստիկանության բոլոր մարմինների միջև` երկրներում գործող օրենսդությունների շրջանակներում և մարդու իրավունքների Համընդհանուր Հռչակագրի ոգով, ստեղծել և զարգացնել հաստատություններ, որոնք արդյունավետորեն կնպաստեն քրեական հանցավորության կանխարգելմանը և դրա դեմ ուղղված պայքարի իրականացմանը:

Ոստիկանական միջազգային համագործակցության հիմնական սկզբունքներն են՝

Հարգանք ազգային ինքնիշխանության նկատմամբ

Համագործակցությունը հիմնված է Ինտերպոլի անդամ երկրների ոստիկանական ուժերի գործողությունների վրա` կապված իրենց երկրներում ազգային օրենքների հետ:

– Հարգանք գործող քրեական օրենքների նկատմամբ

Կազմակերպության գործունեության շրջանակները սահմանափակվում են հանցագործությունների կանխարգելմամբ և քրեական օրենքի դեմ ուղղված հանցագործությունների նկատմամբ օրենքի կիրառմամբ: Սա այն մակարդակն է, որտեղ պահանջվում է համաձայնություն բոլոր անդամ երկրների միջև:

– Համընդհանրությունը

Յուրաքանչյուր անդամ երկիր կարող է համագործակցել մյուս երկրների հետ: Համագործակցությունը չպետք է խոչընդոտեն քաղաքական, աշխարհագրական կամ լեզվական գործոնները:

– Հավասարություն բոլոր անդամ երկրների միջև:

Կազմակերպության բոլոր անդամ երկրները ստանում են միևնույն ծառայությունները` անկախ իրենց անդամավճարների չափերից:

– Համագործակցություն այլ մարմինների հետ

Համագործակցությունը կարող է տարածվել ԱԿԲ-ների և բոլոր անդամ երկրների պետական մարմինների միջև, որոնք մասնակցում են հանցավորության դեմ պայքարին:

– Աշխատանքային մեթոդների ճկունություն

Չնայած, ղեկավարվելով կանոնավորութուն և անընդհատություն ապահովող սկզբունքներով, աշխատանքային մեթոդները բավականին ճկուն են` հաշվի առնելով տարբեր երկրների բազմապիսի կառույցների և տիրող իրավիճակների բազմազանությունը:

Այսօր արդեն Ինտերպոլին անդամակցում են մոտ 188 երկրներ: Անդամ-երկրների այս քանակն ինքնըստինքնյա ընդգծում է կազմակերպության հեղինակությունը և կարևորությունը միջազգային մակարդակով հանցավորության դեմ պայքարում:

Աղբյուրը` Իրավաբան.net