Նախագահ Արմեն Սարգսյանը ապրիլի 3-ին հրմանագիր է ստորագրել որով Արմեն Հայկյանցին նշանակել է բարձրագույն դատական խորհրդի անդամի ժամանակավոր պաշտոնակատար․

Հրամանագրում նշվում է․

«Հիմք ընդունելով Սահմանադրության 138-րդ հոդվածը և հաշվի առնելով Սահմանադրական դատարանի 2020 թվականի մարտի 31-ի ՍԴՈ-1518 որոշումը. Արմեն ՀԱՅԿՅԱՆՑԻՆ նշանակել Բարձրագույն դատական խորհրդի անդամի ժամանակավոր պաշտոնակատար»:

Ծնվել է 1973 թվականին ՀՀ Գեղարքունիքի մարզի Ձորագյուղ գյուղում:

Կրթություն

1995 թվականին ավարտել է Երևանի պետական համալսարանի իրավաբանական ֆակուլտետը:

1996 և 1997 թվականներին վերապատրաստում է անցել Բուդապեշտի Կենտրոնական Եվրոպական համալսարանում:

1996 թվականին վերապատրաստվել է Գերմանիայի Պասսաուի համալսարանում:

1998 թվականին ավարտել է Երևանի պետական համալսարանի իրավաբանական ֆակուլտետի ասպիրանտուրան:

2005 թվականից 2007 թվականը սովորել է ՌԴ Նախագահին կից պետական ծառայության ակադեմիայի առկա դոկտորանտուրայում:

2013 թվականին վերապատրաստվել է Գյոթեի անվան լեզուների ինստիտուտում (Բոնն, Գերմանիա)

2018  թվականին վերապատրաստվել է Արևելյան Եվրոպայի երկրների իրավունքի ինստիտուտում (Քիլ, Գերմանիա):

Աշխատանքային փորձ

1998 թվականից 2002 թվականը եղել է  ԵՊՀ քաղաքացիական իրավունքի ամբիոնի ասիստենտ:

1999 թվականից ՀՀ փաստաբանների պալատի անդամ է: Արտոնագիրը կասեցված է ապրիլից:

2000 թվականից 2004 թվականն աշխատել է ամերիկյան առևտրային կազմակերպության հայաստանյան մասնաճյուղի գլխավոր իրավաբան:

2002 թվականից 2003 թվականը դասախոսել է ՀՀ  Կառավարման ակադեմիայում:

2002 թվականից 2012 թվականը եղել է  ԵՊՀ քաղաքացիական իրավունքի ամբիոնի դոցենտ:

2004 թվականից 2005 թվականն աշխատել է որպես ՀՀ ԱԺ աշխատակազմի օրենսդրության վերլուծության և զարգացման վարչության պետի տեղակալ:

2004 թվականից 2005  թվականը հանդիսացել է ՀՀ ԱԺ և ՄԱԿ-ի հայաստանյան գրասենյակի՝ ՀՀ Մարդու իրավունքների պաշտպանի ինստիտուտի ուղղությամբ հանրային իրազեկության բարձրացման և մարդու իրավունքների պաշտպանության համատեղ ծրագրի Ազգային տնօրեն:

2004 թվականից 2017 թվականը դասախոսել է Հայաստանում ֆրանսիական համալսարանում:

2007 թվականից 2008 թվականը դասախոսել է  Հայ-ռուսական (սլավոնական) համալսարանում:

2009 թվականից 2010 թվականն աշխատել է «Հայկական զարգացման բանկ» ՓԲԸ-ում՝ որպես  գլխավոր իրավաբան:

2012 թվականից առ այսօր ԵՊՀ քաղաքացիական իրավունքի ամբիոնի պրոֆեսոր է:

2014 թվականից առ այսօր հանդիսանում է ՀՀ քաղաքացիական օրենսգրքի բարեփոխման՝ ՀՀ ԱՆ  աշխատանքային խմբի անդամ:

2020 թվականի ապրիլի 3-ին Հայաստանի Հանրապետության նախագահի թիվ ՆՀ-73-Ա հրամանագրով նշանակվել է Բարձրագույն դատական խորհրդի անդամի ժամանակավոր պաշտոնակատար: