Սեպտեմբերի 18-ին Բարձրագույն դատական խորհուրդը հանդիպեց Երևան քաղաքի առաջին ատյանի ընդհանուր իրավասության դատարանի դատավորների հետ: Հանդիպման սկզբում Խորհրդի նախագահ Ռուբեն Վարդազարյանը դատավորներին ներկայացրեց Երևան քաղաքի առաջին ատյանի ընդհանուր իրավասության դատարանի նորանշանակ նախագահ Արթուր Մկրտչյանին:
Այս մասին հայտնում են Բարձրագույն դատական խորհուրդի լրատվական ծառայությունից:
Ներկայացվեցին դատական իշխանության առաջնահերթ խնդիրների լուծման ուղղությամբ Խորհրդի կողմից ձեռնարկված քայլերը: Մասնավորապես շեշտվեց, որ որևէ խնդիր չի լուծվելու դռնփակ կամ գաղտնի ռեժիմով, եթե այն օրենքով նախատեսված չէ դռնփակ իրականացնել, լուծվելու է նյութատեխնիկական ապահովվածության հարցը, նորացվելու է համակարգչային տեխնիկան, ընթացքի մեջ են «Դատակենտրոն» ծրագրի ներդրման աշխատանքները: Նշվեց, որ կամավորության սկզբունքով դատավորների սեփական ավտոմեքենաների համար կտրամադրվեն ծառայողական պետհամարանիշներ:
Դատավորների հետ տեղի ունեցավ կառուցողական, բաց և անմիջական հարցուպատասխան:
Դատավորներ Կարինե Պետրոսյանի, Լիզա Գրիգորյանի, Հովհաննես Շահնազարյանի, Արթուր Ստեփանյանի հնչեցրած հարցադրումները վերաբերում էին օրենսդրական փոփոխություններին, կարգապահական վարույթների հարուցմանը, գործերի բաշխման համակարգին, դատական ծառայողների աշխատավարձերին և այլ կարևոր խնդիրների: Խորհրդի նախագահը և անդամներն իրենց հերթին նկատեցին, որ բարձրացված հարցերը օրակարգային են, և դրանց մի մասի վերաբերյալ արդեն իսկ համապատասխան քայլեր են ձեռնարկվել, մի շարք հարցեր էլ ուսումնասիրման փուլում են:
Քննարկվող խնդիրների վերաբերյալ արդյունավետ լուծման առաջարկներ ներկայացրին դատավորներ Երեմ Եսոյանը և Դավիթ Բալայանը: Դատավորի նկատմամբ հանրային բացասական ընկալումների և կարծիքի իր մտահոգությունների կապակցությամբ սուր ելույթով հանդես եկավ դատավոր Զարուհի Նախշքարյանը:
Խորհրդի անդամներ Անի Մխիթարյանը, Լիպարիտ Մելիքջանյանը, Մեսրոպ Մակյանը և Գրիգոր Բեքմեզյանն իրենց հերթին փաստեցին, որ Խորհուրդը պատրաստակամ է դատավորների հետ ամենօրյա ռեժիմով աշխատելու համար և վստահեցրին, որ առաջիկայում ականատես կլինեն դրական տեղաշարժերի:
![](https://scontent.fevn1-4.fna.fbcdn.net/v/t1.0-9/70431995_1267458716769101_8560761769671262208_o.jpg?_nc_cat=106&_nc_oc=AQkE7GKLlt8y1BiBI5VzmQwrIq8dpL4hvrwYKGk9cny7L0KgH06Qneeg2wD7XHeQjUc&_nc_ht=scontent.fevn1-4.fna&oh=d8a630245b3a4572336cbd32461b006c&oe=5E098D57)
![](https://scontent.fevn1-1.fna.fbcdn.net/v/t1.0-9/71347145_1267459693435670_2606964472006311936_o.jpg?_nc_cat=109&_nc_oc=AQmSF13tSXewp7P-AunXH9Wb_oQbe-GalO3EiOyjYkCh2DCW2RO7afHghlOnmoZKRSg&_nc_ht=scontent.fevn1-1.fna&oh=3ba33780fdc37e984fa387c5ccb00c59&oe=5E046E2B)
![](https://scontent.fevn1-4.fna.fbcdn.net/v/t1.0-9/70795562_1267460716768901_311587331725328384_o.jpg?_nc_cat=101&_nc_oc=AQkiboHJjAcI23s79_VCTHcBrJW3RiqKzmQQod1InAZsPLi-zOaXn1gYvnuN0j08tTM&_nc_ht=scontent.fevn1-4.fna&oh=2347dee89b68d83be6cd86c3206188fe&oe=5E04AA76)
![](https://scontent.fevn1-1.fna.fbcdn.net/v/t1.0-9/70698012_1267461013435538_1858533465394249728_o.jpg?_nc_cat=102&_nc_oc=AQk6NVw_nFfgJN51qEg1m6nxeXXpLDj6CjTxBeDPcne81xoiGWrO7ZUTV_3_-w7osvU&_nc_ht=scontent.fevn1-1.fna&oh=2eb96e9894d01da3f0114f32bf51d360&oe=5E3BD5E8)