Այսօր՝ ապրիլի 3-ին, Քննչական կոմիտեում ներկայացվեց Քրեական գործերով խափանման միջոց կիրառելու հիմքերի, խափանման միջոց կիրառելու կարգի, կալանավորման, կալանքի տակ պահելու ժամկետի վերաբերյալ ուղեցույցը:
Ուղեցույցում ընդգրկվել են Մարդու իրավունքների եվրոպական կոնվենցիայի 5-րդ հոդվածի՝ ազատության և անձնական անձեռնմխելիության իրավունքի համատեքստում խափանման միջոց կալանավորման վերաբերյալ Մարդու իրավունքների եվրոպական դատարանի արտահայտած դիրքորոշումները, Հայաստանի Հանրապետության վերաբերյալ կայացված վճիռների սեղմագրերը, ինչպես նաև Հայաստանի Հանրապետության վճռաբեկ դատարանի քրեական պալատի 2007-2017 թվականների ընթացքում կայացրած բոլոր ըստ էության որոշումների սեղմագրերը, որոնք վերաբերում են Հայաստանի Հանրապետության քրեական դատավարության օրենսգրքի 135-138-րդ հոդվածներով ամրագրված խափանման միջոց կիրառելու հիմքերին, խափանման միջոց կիրառելու կարգին, կալանավորմանը և կալանքի տակ պահելու ժամկետին:
Քննչական կոմիտեի նախագահ Հայկ Գրիգորյանը կարևորեց ուղեցույցի կազմումը ու նշեց, որ իր հրավերով է Գևորգ Կոստանյանը մասնակցել դրա ստեղծմանը:
«Ես, իմ նախաձեռնությամբ, դիմեցի նախկին գլխավոր դատախազ, Մարդու իրավունքների եվրոպական դատարանում ՀՀ կառավարության նախկին լիազոր ներկայացուցիչ Գևորգ Կոստանյանին, որը ունի հարուստ փորձ և նշված տարիներին առնչվել ու կարգավորել է քննարկվող խնդիրները: Աջակցել է մեզ ինչպես ՀՀ-ում, այնպես էլ ՄԻԵԴ-ում ներկայացվելիք ուղեցույցի մշակման գործընթացին»,-նշեց Հայկ Գրիգորյանը:
ՔԿ նախագահը նաև մի քանի թվային ցուցանիշ ներկայացրեց.
2017 թվական
- ձերբակալվել է 775 անձ,
- ձերբակալության օրինաչափությունը բողոքարկվել է 27 դեպքում,
- ձերբակալումը ճանաչվել է ոչ իրավաչափ 7 դեպքում:
2018 թվական
- ձերբակալվել է 724 անձ,
- ձերբակալության օրինաչափությունը բողոքարկվել է 38 դեպքում,
- ձերբակալումը ճանաչվել է ոչ իրավաչափ 22 դեպքում:
2019 թվական (հունվար, փետրվար)
- ձերբակալվել է 152 անձ,
- ձերբակալության օրինաչափությունը բողոքարկվել է 21 դեպքում,
- ձերբակալումը ճանաչվել է ոչ իրավաչափ 18 դեպքում:
«Ինչպես տեսնում ենք, նվազել են ձերբակալումների քանակական ցուցանիշները»,-նշեց Հայկ Գրիգորյանը:
Գևորգ Կոստանյանը, խոսելով ուղեցույցի անհրաժեշտության մասին նշեց, որ երկրում սոցիալական արդարության ամրապնդման հիմնական ձևը քրեական արդարադատության երաշխիքների պատշաճ պահպանումն է:
«Իսկ բոլորիդ համար գաղտնիք չէ, որ քրեական արդարադատության մեջ առավել կարևորը անձի ազատության և անձեռնմխելիության իրավունքի երաշխավորումն է: Հենց դրա համար մենք կենտրոնացանք անձի ազատության և անձեռնմխելիության իրավունքի վրա, այսինքն, ձերբակալման և կալանավորման օրինաչափության հարցերին: Առաջին հայացքից ամեն ինչ պարզ է, քանի որ քրեական դատավարության օրենսգիրքը պարզ սահմանում է կարգերը, սակայն ոչ ոքի համար գաղնիք չէ, որ ՔԴՕ-ի ամեն նորմ ՄԻԵԴ-ի կողմից բազմահատոր մեկնաբանման է ենթարկվել»,-նշեց Գևորգ Կոստանյանը:
Փաստաբանների պալատի նախագահ Արա Զոհրաբյանը նշեց, որ ուղեցույցը կարող է օգտակար լինել նաև փաստաբանների համար:
«Ցավոք, փաստաբանները հաճախ են այս դրույթները պետական մարմիններին հիշեցնելու առիթ ունենում: Կարծում եմ կհամաձայնվեք, որ հանրության համար կարևոր է ոչ թե որակով օրենքը, այլ նաև օրենքի ճիշտ կիրառումը: Ամենալավ օրենքը վատ կիրառողի ձեռքում դառնալու է չարիք նույն հանրության համար»,-նշեց նա:
Մանրամասները՝ տեսանյութերում
