Սյունիքի մարզի առաջին ատյանի դատարանը՝ դատավոր Նապոլեոն Օհանյանի նախագահությամբ, այսօր հրապարակված դատավճռով ճանաչել և հռչակել է փաստաբան, ամբաստանյալ Արշավիր Խալափյանի անմեղությունը՝ ՀՀ քրեական օրենսգրքի 200-րդ հոդվածի 3-րդ մասով՝ առևտրային կաշառք ստանալը՝ (1-ին դրվագով), և նրան արդարացրել` ապացույցների անբավարարության (հանցագործությանն ամբաստանյալի մասնակցությունն ապացուցված չլինելու) հիմքով: Ինչպես հաղորդում է «Փաստինֆո» գործակալությունը, ՀՀ քրեական օրենսգրքի 200-րդ հոդվածի 3-րդ մասով (երկրորդ դրվագով) Արշավիր Խալափյանը մեղավոր է ճանաչվել և դատապարտվել 1 տարվա ազատազրկման: Նշանակված պատժին հաշվակցվել է Արշավիր Խալափյանի կալանքի տակ գտնվելու ժամանակահատվածը` 2014 թվականի օգոստոսի 2-ից մինչև օգոստոսի 6-ը` 4 օրը և վերջնական պատիժ է սահմանվել ազատազրկում 11 ամիս 26 օր ժամկետով: Արշավիր Խալափյանի նկատմամբ կիրառված գրավ խափանման միջոցը թողնվել է անփոփոխ մինչև դատավճռի օրինական ուժի մեջ մտնելը:Հիշեցնենք, որ ըստ մեղադրանքի առաջին դրվագի, Արշավիր Խալափյանը՝ հանդիսանալով ՀՀ Փաստաբանների պալատի փաստաբան, ստանձնելով Սյունիքի մարզի, Սյունիք համայնքի բնակիչներ Հ.Մարգարյանի ու Է. Կարապետյանի շահերի պաշտպանությունը, վերջիններիս ենթադրյալ իրավունքների խախտման կապակցությամբ հաղորդում է ներկայացրել իրավապահ մարմիններին` համայնքի «Հին գերեզմաններ» կոչվող վայրում համայնքի ղեկավար Սամվել Սարգսյանի գերեզմանատեղեր ապօրինի հատկացնելու վերաբերյալ, որի հիման վրա հարուցվել է քրեական գործ:

Այնուհետև նշված քրեական գործի նախաքննության ընթացքում` 2014թ-ի մարտին, Կապանի «Դարիստ» հյուրանոցային համալիրում հանդիպել է Ս.Սարգսյանի որդուն` Սարմեն Սարգսյանին և ի վնաս նրա հոր գործողություններ չկատարելու` նոր բողոքներ չներկայացնելու, ինչպես նաև իր վստահորդներին մոլորության մեջ գցելու եղանակով, նախկինում ներկայացված դիմումների ելքերով վերջիններիս կողմից չհետաքրքրվելու պայմանով, Սարմեն Սարգսյանից ապօրինի պահանջել է 10.000 ԱՄՆ դոլլար:

Իսկ մեղադրանքի երկրորդ դրվագի համաձայն, Արշավիր Խալափյանը 07-04-2014թ նախ որպես Կապան քաղաքի Ռ.Մինասյան փողոցի 17 շենքի բնակիչ գրավոր դիմել է Կապանի քաղաքապետարան` Աշոտ Կույումջյանի կողմից նշված հասցեին հարակից տարածքում ապօրինի շինարարություն կատարելու վերաբերյալ համապատասխան տեղեկատվություն ստանալու համար, իսկ 18-04-2014թ-ին որպես ՀՀ Փաստաբանների պալատի փաստաբան, «Հայաստանի երիտասարդ իրավաբանների ասոցիացիա» ՀԿ Սյունիքի մարզային մասնաճյուղի նախագահ և Սյունիքի հակակոռուպցիոն կենտրոնի համակարգող, դարձյալ նույն նպատակով` հերթական դիմումն է ներկայացրել քաղաքապետարան, որից հետո 2014թ-ի մայիսի 1-ին վերոհիշյալ հյուրանոցային համալիրի թիվ 210 սենյակում հանդիպել է Ա. Կույումջյանին ու իր կողմից ներկայացված դիմումների ընացքի վերաբերյալ գործողություններ չկատարելու, այն է հետևողականություն չցուցաբերելու, նոր դիմումներիի չներկայացնելու, ավելի խիստ վարչական պատասխանատվության ենթարկվելու համար խնդիրներ չառաջացնելու, դարձյալ հանդես գալով որպես փաստաբան և հիշյալ կառույցների մարզային ներկայացուցիչ` Աշոտ Կույումջյանից որպես կաշառք ապօրինի պահանջել է 1500 ԱՄՆ դոլլար:

Նշենք, որ մեղադրողը միջնորդել էր փաստաբանին դատապարտել երկու տարվա ազատազրկման՝ կալանքի վերցնելով նրան հենց դատարանի դահլիճից՝ թեև հոդվածով նախատեսված է նաև ազատազրկման հետ չկապված պատիժ: Այսպես, հոդվածով նախատեսվում է պատիժ՝ տուգանք նվազագույն աշխատավարձի երկուհարյուրապատիկից չորսհարյուրապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկել՝ առավելագույնը երեք տարի ժամկետով, կամ ազատազրկում՝ առավելագույնը երեք տարի ժամկետով:

Իրավաբան.net