Վերջին տարիներին ՀՀ֊ում ավելանում է այն օտարերկրացիների թիվը, որոնք գալիս են Հայաստան աշխատելու նպատակով։ Ըստ Միգրացիայի և քաղաքացիության ծառայության ներկայացրած վիճակագրության՝ 2025 թվականի հունվար-հունիս ամիսներին ՀՀ֊ում կացության կարգավիճակ ստանալու համար դիմել է մոտ 6700 օտարերկրացի։
2024 թվականի նույն ժամանակահատվածում Ծառայությունում ստացվել է 6200 դիմում։
Սա պայմանավորված է նաև այն հանգամանքով, որ վերջին տարիներին Օտարերկրացիների համար Հայաստանում աշխատանքի թույլտվությունն առավելապես պարզեցվել ու թվայնացվել է:
Մասնավորապես, 2022-ի հունվարի 1-ից ուժի մեջ են մտել «Օտարերկրացիաների մասին» և հարակից օրենքներում փոփոխությունները:
Եթե մինչև օրենսդրական փոփոխությունների իրականացումն այդ գործընթացն իրականացվում էր երկու տարբեր վարչական մարմինների կողմից և ամբողջ գործընթացը կարող էր տևել 2 ամիս և ավելի, այժմ այն իրականացվում է թվայնացված էլեկտրոնային հարթակի միջոցով և ամբողջ գործընթացը տևում է առավելագույնը 30 օր:
Ինչպե՞ս է կատարվում գործընթացը։
Քայլ 1.
Գործատուն գրանցվում է համակարգում և լրացնում թափուր պաշտոնի նկարագիրը։
Քայլ 2.
Համակարգը իրականացնում է ավտոմատացված համադրում ՀՀ ԱՍՀՆ տվյալների շտեմարանի հետ՝ ՀՀ քաղաքացի աշխատանք որոնող գտնելու նպատակով։
- Եթե համակարգը չի հայտնաբերում համընկնումներ, գործատուն անմիջապես տեղեկացվում է օտարերկրացու հետ աշխատանքային պայմանագիր կնքելու հնարավորության մասին։
- Եթե համակարգը հայտնաբերում է համընկնում, ՀՀ ԱՍՀՆ-ի համապատասխան ստորաբաժանումը համակարգից ստանում է ծանուցում առկա թափուր աշխատատեղի մասին։ Սահմանված ժամկետում թափուր աշխատատեղը ՀՀ քաղաքացիով չհամալրվելու դեպքում գործատուն ստանում է ծանուցում օտարերկրացու հետ պայմանագիր կնքելու հնարավորության մասին։ Աշխատատեղը ՀՀ քաղաքացիով համալրելու պարագայում ԱՍՀՆ-ի կողմից կատարվում է համապատասխան նշում համակարգում, ինչից հետո գործատուի կողմից բացված «Հայց»-ը փակվում է և հեռացվում համակարգից։
Քայլ 3.
Գործատուն մուտքագրում է համակարգ օտարերկրացու տվյալները՝ կցելով պահանջվող փաստաթղթերը։
Քայլ 4.
ՀՀ ԱԱԾ-ի, ՀՀ ոստիկանության համապատասխան ստորաբաժանումները ստանում են ծանուցում՝ համակարգ մուտքագրված օտարերկրացու տվյալների վերաբերյալ։
Սահմանված ժամկետում ՀՀ ԱԱԾ-ն և ՀՀ ոստիկանությունը հայտնում են իրենց դիրքորոշումը կոնկրետ օտարերկրացու վերաբերյալ՝ կողմ կամ դեմ։
Քայլ 5.
Միգրացիոն ծառայությունը ստացված կարծիքների հիման վրա կայացնում է որոշում՝ «Աշխատանքի թույլտվության տրամադրումը հնարավոր է» կամ «Մերժել աշխատանքի թույլտվության տրամադրումը»։
Քայլ 6.
Օտարերկրացին ստանում է Միգրացիոն ծառայության էլեկտրոնային ստորագրությամբ հաստատված՝ «ՀՀ-ում աշխատանքի թույլտվություն ստանալու հնարավորության մասին» տեղեկանք, որն այլ պահանջվող փաստաթղթերի հետ ներկայացնում է ՀՀ հյուպատոսական հիմնարկ և ստանում Ա-վիզա։
Քայլ 7.
ՀՀ ժամանելուց հետո օտարերկրացին կնքում է աշխատանքային պայմանագիր և դրա պատճենը, ինչպես նաև առողջության ապահովագրությունը, ի թիվս այլ պահանջվող փաստաթղթերի, անձամբ ներկայացնում միգրացիոն ծառայություն, ինչից հետո սահմանված ժամկետում ծառայությունն ընդունում է օտարերկրացուն ՀՀ-ում աշխատանքի թույլտվության տրամադրման մասին որոշում։
