Վարչապետի կինը՝ Աննա Հակոբյանը, Ցեղասպանության 110-րդ տարելիցի առթիվ սոցիալական ցանցերում որևէ գրառում, կարծես, չի կատարել և ենթադրվում է նաև, որ նա Ծիծեռնակաբերդի հուշահամալիր չի այցելել, քանի որ մամուլում ևս այդ մասին որևէ հաղորդագրություն չի տարածվել։

Iravaban.net-ը փորձել է կապվել վարչապետի տիկնոջ հետ՝ պարզելու, թե նա արդյոք երեկ այցելել է Ծիծեռնակաբերդ, սակայն որևէ պատասխան չի ստացվել։ «Իմ քայլը» հիմնադրամից հայտնեցին, որ նա այս պահին տեղում չէ։

Հիշեցնենք՝ անցյալ տարի Աննա Հակոբյանը հուշակոթողին էր եկել կրտսեր դստեր հետ՝ թիկնազորի ուղեկցությամբ: Նրան հաջողվել է ծաղիկներ դնել անմար կրակի մոտ, սական քաղաքացիները նրանց դիմավորեցին «Նիկոլ, ցեղասպան», «Նիկոլ, դավաճան», «Նիկոլ, թուրք» վանկարկումներով։

Մամուլում լուրեր էին շրջանառվում նաև, որ տեղի ունեցածը բացասաբար է ազդել երեխայի վրա։

Միջադեպի առնչությամբ ՀՀ քրեական օրենսգրքի 329-րդ հոդվածի 2-րդ մասի 1-ին կետով (Մի խումբ անձանց կողմից, նախնական համաձայնությամբ, ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքը, ինչպես նաև այդ նպատակով նյութեր կամ առարկաներ տարածելը) նախաձեռնվել էր քրեական վարույթ։