Այսօր՝ հուլիսի 26-ին, ժամը 14:00-ի սահմաններում, սոցիալական կայքերում տարածված տեսանյութի (Փոքր Վեդու «Զարթոնք» ՆՈՒՀ-ՀՈԱԿ-ում տեղի ունեցած միջադեպով) կապակցությամբ տեղեկացնում ենք, որ դեպքի մասին իրազեկվելուց անմիջապես հետո Վեդի համայնքի ղեկավարը իր լիազորությունների շրջանակներում հետամուտ է եղել դեպքի հանգամանքների բացահայտման, մեղավորներին պատասխանատվության ենթարկելու և հետագայում նմանատիպ դեպքերը բացառելու ուղղությամբ: Այս մասին հայտնում են Վեդու համայնքապետարանից։
«Միաժամանակ տեղեկացնում ենք, որ դեպքի հանգամանքները պարզելու նպատակով համապատասխան հաղորդում է ներկայացվել ՀՀ ՆԳՆ ոստիկանության Արարատի մարզային վարչության Արարատի բաժին»,-նշվում է հաղորդագրության մեջ:
Համայնքի ղեկավար Գարիկ Սարգսյանը ևս անդրադարձել է դեպքին․ «Վեդի համայնքի Փոքր Վեդի բնակավայրի մանկապարտեզում տեղի ունեցած զարհուրելի դեպքի առիթով տվյալ դաստիարակը և մանկապարտեզի տնօրենը հրավիրվել են ոստիկանության Արարատի բաժին։
Վստահեցնում եմ՝ մեղավորները խստագույն պատժի կենթարկվեն։ Հետամուտ եմ լինելու նաեւ նման վարք ունեցող մանկավարժներին ժամ առաջ մեր մանկապարտեզներից մաքրելու գործում»։
ՆԳՆ-ից հայտնում են․ «Համացանցում տեսանյութ է տարածվել, որում Փոքր Վեդիի մանկապարտեզներից մեկում երեխային աշխատակիցը ծեծի է ենթարկում։ Տեսանյութն ուսումնասիրվում է»։
Դեպքը նոր է թե ոչ, իսկապես Վեդիում է թե ոչ՝ դեռեւս պարզ չէ, հավելյալ տեղեկության դեպքում կհայտնեն։
Տեսանյութը՝ այստեղ։
