Արմավիր քաղաքում՝ ազդարարման համակարգի համապետական իրազեկման արշավի շրջանակում կայացավ մարզային դասընթաց Արմավիրի մարզի տեղական ինքնակառավարման մարմինների և մարզպետարանների ներկայացուցիչների մասնակցությամբ։

Դասընթացի ընթացքում փորձագետները խոսեցին ազդարարման համակարգի, գործող azdararir.am ազդարարման միասնական հարթակի մասին, ինչպես նաև անդրադարձ կատարեցին օրենսդրական կարգավորումներին։

Ապա, պրակտիկ հմտությունների զարգացման նպատակով, մասնակիցներն իրականացրեցին գործնական և խմբային աշխատանքներ։ Աշխատանքների ընթացքում մասնակիցները ներկայացրեցին իրենց տեսակետները համակարգի վերաբերյալ։

Դասընթացները իրականացվում են Գերմանիայի միջազգային համագործակցության ընկերության (GIZ) հետ համագործակցության շրջանակում՝ «Իրավաբանների հայկական ասոցիացիա» ՀԿ-ի և Արդարադատության նախարարության հետ համատեղ ջանքերով:

Արշավի շրջանակներում իրականացվող մարզային դասընթացների նպատակն է նվազեցնել ազդարարների շուրջ բացասական ընկալումները, բարձրացնել հասարակության իրազեկվածությունը ազդարարի կենսական դերի մասին, ինչպես նաև ընդգծել Ազդարարման միասնական էլեկտրոնային հարթակի (azdararir.am) դերը կոռուպցիայի դեմ պայքարում:

Համապետական արշավի շրջանակում կրթական միջոցառումներ նախատեսվում են իրականացնել Հայաստանի բոլոր մարզերում՝ ներգրավելով համայնքային ծառայողներին և այլ ներկայացուցիչներին: Այս դասընթացին նախորդել են համանման ուսուցումներ Սևանում, Եղեգնաձորում և Գորիսում։