Բոլորը պարտավոր են դատարանի նկատմամբ հարգալից վերաբերմունք դրսևորել:
Դատախազը պարտավոր է հարգել դատարանի անկախությունն ու անկողմնակալությունը և մասնավորապես չպետք է իր գործողություններով կասկածի տակ դնի դատական ակտի օրինականությունը կամ խոչընդոտի դրա կատարմանը, բացառությամբ դատական ակտի բողոքարկման իր իրավունքն իրագործելիս:
Դատարանի նկատմամբ անհարգալից վերաբերմունքը կարող է արտահայտվել ինչպես պաշտոնեական լիազորությունների իրականացման առնչությամբ դատավորին, այնպես էլ դատավարությանը մասնակցող անձանց վիրավորելով: Դատարանի նկատմամբ անհարգալից վերաբերմունք դրսևորելն առաջացնում է դատական սանկցիայի կիրառում, ինչպես նաև քրեական պատասխանատվություն:
ՀՀ քրեական օրենսգրքի 343-րդ հոդվածի համաձայն՝
Դատարանի նկատմամբ անհարգալից վերաբերմունքը, որը դրսևորվել է դատավարությանը մասնակցող անձանց վիրավորելով՝ պատժվում է տուգանքով՝ նվազագույն աշխատավարձի հարյուրապատիկից երեքհարյուրապատիկի` 100.000-200.000 դրամի չափով, կամ կալանքով՝ մեկից երկու ամիս ժամկետով:
Դատարանի նկատմամբ անհարգալից վերաբերմունքը, որը դրսևորվել է պաշտոնեական լիազորությունների իրականացման առնչությամբ դատավորին վիրավորելով՝ պատժվում է տուգանքով՝ նվազագույն աշխատավարձի երկուհարյուրապատիկից հինգհարյուրապատիկի` 200.000-500.000 դրամի չափով, կամ կալանքով՝ երկուսից երեք ամիս ժամկետով:
