Երևանի քաղաքապետ Տարոն Մարգարյանի հանձնարարությամբ մայրաքաղաքի բոլոր փողոցներում իրականացվում է վթարված և չգործող լուսացույցների ու ճանապարհային նշանների գույքագրում՝ համապատասխան կազմակերպությունների կողմից դրանք վերականգնելու և նորերով փոխարինելու նպատակով:
2013 թվականի հունվարից լուսացուցային տնտեսության արդիականացման աշխատանքների շրջանակում ՀՀ ոստիկանության Ճանապարհային ոստիկանություն ծառայության կողմից համակարգվող «Լուսանշան» ՊՈԱԿ-ը լուսադիոդային ժամանակակից նոր լուսացուցային օբյեկտներով է վերազինել մայրաքաղաքի թվով 10 խաչմերուկ։ Մասնակի վերականգնման աշխատանքներ են կատարվել 12 խաչմերուկում, որտեղ տեղադրված լուսացույցները կոտրվել և վթարվել էին այս կամ այն պատճառով: 10 նոր լուսացուցային օբյեկտներով են կահավորվել նաև որոշ ճանապարհահատվածներ և խաչմերուկներ, որոնցում մինչ այդ լուսացուցային կարգավորում կիրառված չի եղել։
Զուգահեռ իրականացվում են նաև ճանապարհային նշանների վերականգնման, նորերով կահավորման և փողոցների գծանշման աշխատանքները:
Ընթացիկ տարվա 10 ամիսների ընթացքում մայրաքաղաքում տեղադրվել է ընդհանուր առմամբ 1559 նոր ճանապարհային նշան, որից միայն 40-ը՝ նախորդ շաբաթվա ընթացքում:
Գծանշման աշխատանքների շրջանակում կատարվել է ավելի քան 1 միլիոն 700 հազար գծամետր գծանշում։ Ի դեպ, նշենք, որ քաղաքապետի հանձնարարությամբ հատուկ ուշադրություն է դարձվում ինչպես հիմնանորոգվող փողոցների սեղմ ժամկետում գծանշմանը, այնպես էլ երկրորդական և երրորդական փողոցներում, կրթական և առողջապահական հաստատությունների հարակից տարածքներում համապատասխան աշխատանքների իրականացմանը:
Լուսանկարը՝ yerevan.am-ի
Իրավաբան.net