Ռուսաստանը դիվանագիտական ուղիներով մշտական կապի մեջ է Իրանի և Պակիստանի հետ, հայտարարել է ՌԴ նախագահի մամուլի քարտուղար Դմիտրի Պեսկովը, գրում է РИА Новости-ն։
«Մենք կոչ ենք անում բոլոր կողմերին, տարածաշրջանի բոլոր պետություններին և հարակից շրջաններին ցուցաբերել զսպվածություն և դիվանագիտություն: Այս դեպքում դա միակ բանն է, որը կարող է օգնել դեէսկալացիայի ուղին բռնել»,-ասել է Պեսկովը՝ պատասխանելով այն հարցին, թե արդյոք իրավիճակը, որը տիրում է.Մերձավոր Արևելքում, անհանգստացնում է Կրեմլին։
Հարցին, թե արդյո՞ք նախատեսված են ամենաբարձր մակարդակով շփումներ Իրանի և Պակիստանի հետ, Պեսկովը պատասխանել է, որ ռուսական կողմը, դիվանագիտական ուղիներով, մշտական կապ է պահպանում նշված երկրների հետ։
Հունվարի 18-ին Պակիստանի ԱԳՆ-ն հայտարարել էր Իրանի Սիստան և Բելուջիստան նահանգում ահաբեկիչների թաքստոցների վրա հարձակումների մասին: Արտաքին գործերի նախարարությունը նշել էր, որ գործողության թիրախը պակիստանական ծագումով ահաբեկիչներն են, որոնք իրենց անվանում են «սարմաչարներ»։ Ըստ Պակիստանի ԱԳՆ-ի՝ դրանք տարածքներ են, որոնք տվյալ երկրի տարածքում են, բայց դուրս են երկրի կառավարության վերահսկողությունից։ Միևնույն ժամանակ ԱԳՆ-ն նշել է, որ Պակիստանը հարգում է Իրանի Իսլամական Հանրապետության ինքնիշխանությունն ու տարածքային ամբողջականությունը, և հարվածների միակ նպատակը Պակիստանի սեփական անվտանգությունն ու ազգային շահերի ապահովումն է։
Իրանական կողմը հայտարարել էր 7 զոհի մասին, այդ թվում՝ 3 կին և չորս երեխա։ Բոլորն էլ օտարերկրացի են։
