Կան որոշ թեմաներ, որոնց մասին պետք չէ խոսել աշխատավայրում ոչ ոքի հետ: Իհարկե լավ է կատակել գործընկերների հետ, սակայն կարևոր է իմանալ թույլատրելիի սահմանը. Մենք սովորաբար հակահարված ստանում ենք, երբ հատում ենք թույլատրելիի ու անթույլատրելիի սահմանը: Այս ցանկը սպառիչ չէ, պարզապես կարող է կողմնորոշիչ դեր ունենալ:
1. Աշխատավարձ կամ գումարային մանրամասներ – երբեք մի խոսեք փողի մասին աշխատավայրում, ձեր աշխատավարձի մանրամասների կամ այն մասին, թե որքան եք ծախսել ձեր բնակարանի, ավտոմեքենայի կամ գնումների համար: Խոսելով փողի մասին, կարող եք «վաստակել» այնպիսի բացասական զգացողություններ, ինչպիսիք են նախանձն ու դժգոհությունը:
2. Անձնական կյանք – ձեր կյանքը կարող է լինել շատ զարմանալի կամ միապաղաղ, սակայն պետք չէ այդ մասին խոսել աշխատավայրում:
3. Ակլոհոլի օգտագործման մասին – նույնիսկ եթե ցանկանում եք կիսվել ձեր մասնակցությամբ խնջույքի մանրամասներով, մի արեք դա աշխատավայրում, դա կդիտվի ոչ պրոֆեսիոնալ:
4. Քաղաքական հայացքներ – քաղաքական հայացքների կամ ընդհանրապես քաղաքականության մասին խոսակցությունները կարող են ներգրավել շատ մարդկանց ու աշխատավայրում աղմուկի տեղիք տալ:
5. Կրոնական հայացքներ – նույն պատճառով, ինչ որ քաղաքական հայացքների դեպքում: Շատ կարևոր է, որ մարդիկ ունենան հավատք, սակայն պետք է հիշել, որ շատ պատերազմներ սկսվել են հավատքի տարբերության պատճառով:
6. Կատակներ որևէ անձի վերաբերյալ – բոլորս էլ սիրում ենք կատակել, սակայն ընդունելի չէ, եթե կատակները ընդդեմ որևէ անձի են: Ցանկացած պարագայում կատակելիս պետք է կրկին մտածել՝ արդյո՞ք այն չի վիրավորի որևէ մեկին:
7. Տարանջատել սոցիալական կայքերը գործընկերների և ընկերների համար – ընկերների հետ մենք մեզ ավելի ազատ ենք զգում, կարող ենք նրանց ցույց տալ նկարներ, նրանց հետ կիսվել մտքերով, ինչը չենք անի գործընկերների հետ: Այդ իսկ պատճառով կարևոր է ունենալ տարբեր սոցիալական կայքերի հաշիվներ մտերիմ ընկերների և գործընկերների համար:
8. Բժշկական մանրամասներ – Ինչ – ինչ պատճառներով, մենք սիրում ենք խոսել մեր հիվանդությունների մասին: Թեև այդ թեման կարող է հետաքրքրել գործընկերներին, սակայն, հավատացեք, աշխատավայրն այն վայրը չէ, որտեղ կարելի է խոսել ձեր առողջության մանրամասների մասին:
9. Բամբասանքներ և բացասական մեկնաբանություններ գործընկերների վերաբերյալ – նույնիսկ եթե դուք չեք կարողանում զսպել ձեզ խոսելու այն մասին, թե ինչպիսի հակասություններ են եղել երկու այլ աշխատակիցների միջև, տիրապետեք ձեզ և մի խոսեք այդ մասին:
10. Նոր աշխատանք փնտրելու մասին – դուք կարող եք հարմարավետ չզգալ ձեզ ձեր աշխատավայրում, սակայն պետք չէ այդ մասին բարձրաձայնել, քանի որ այդ հանգամանքը կարող է առաջացնել երկուստեք անհարմար իրավիճակ:
Վերը նշվածը չի նշանակում, որ աշխատավայրում պետք է աշխատել ռոբոտի նման և չունենալ անհատականություն, անձնական շփումներ: Պարզապես վերը նշված կանոնները կարող են զերծ պահել ձեզ անցանկալի տպավորություններից:
