Հաղթեց ժողովրդավարությունը, հաղթեց հեղափոխությունը։ Հանրային հեռուստաընկերության եթերում այս հայտարարությունն է արել ՀՀ վարչապետ Նիկոլ Փաշինյանը՝ անդրադառնալով Տիգրան Ավինյանի՝ Երևանի քաղաքապետ ընտրվելուն։
«Այս ընտրությունների արդյունքները ցույց տվեցին մեր անսասանելի հավատարմությունը 2018թ․-ի ժողովրդական ոչ բռնի թավշյա հեղափոխության արժեքներին, ժողովրդավարությանը, օրենքի գերակայությանը և ժողովրդի կամքի անառարկելի հարգանքին»,- ասել է Փաշինյանը։
Նրա խոսքով՝ իրենք արդեն երկու անգամ ապացուցել են, որ անգամ մեկ քաղաքացու քվեին և քվեաթերթիկին ձեռք չեն տա և չեն կեղծի։
«Բոլորին էլ պարզ է, որ ՀՀ-ում որևէ մակարդակում որևէ իշխանություն կարող է ձևավորվել միայն ու միայն ժողովրդի ազատ կամարտահայտման միջոցով»,- ասել է վարչապետը։
Փաշինյանն ընդգծել է՝ այն ուժերը որոնք հանդես են եկել որպես 2018թ․-ի հեղափոխության արժեքների կրող և պաշտպան, հավաքել են 60 տոկոսից ավելի ձայն։ Այլ հարց է, թե նրանցից ով է ավելի անկեղծորեն նվիրված այդ արժեքներին, իսկ ով է մանիպուլացնում։
« Ես ուզում եմ իմ գնահատանքի խոսքերն արտահայտել «Հանրապետություն» կուսակցության նկատմամբ, որ իր հետևողական քաղաքականության և այդ թվում հեղափոխության, ժողովրդավարության արժեքներին իր հավատարմության շնորհիվ շատ ձայներ հավաքեց »,- հավելել է վարչապետը։
