Լեռնային Ղարաբաղում (Արցախի Հանրապետություն՝ խմբ․) էթնիկ հայերի թիվը, ըստ տարածաշրջանում մնացած մարդկանց, կարող է տատանվել 50-1000-ի սահմաններում։ Այս մասին ճեպազրույցում հայտարարել է ՄԱԿ-ի գլխավոր քարտուղարի ներկայացուցիչ Ստեֆան Դյուժարիկը, փոխանցում է ՏԱՍՍ-ը։
«ՄԱԿ–ի թիմը տեղական համայնքների ներկայացուցիչներից լսել է, որ Ղարաբաղում (Արցախ՝ խմբ․) մնում է 50–ից մինչև 1000 էթնիկ հայ»,– ասել է նա:
Դյուժարիկը հավելել է, որ տարածաշրջան այցելության մեկ օրվա ընթացքում, որի ընթացքում համաշխարհային կազմակերպության ներկայացուցիչները եղել են Ստեփանակերտում, ՄԱԿ-ի առաքելությունը քաղաքացիական ենթակառուցվածքների ոչնչացման որևէ նշան չի հայտնաբերել՝ այդ թվում դպրոցների, հիվանդանոցների՝ չնայած բոլոր խանութները փակվել են:
«Նրանք չեն լսել խաղաղ բնակիչների նկատմամբ բռնության մասին որևէ հաղորդում վերջին հրադադարից հետո: Նրանք չեն հայտնաբերել սատկած անասուններ կամ ընտանի կենդանիներ կամ գյուղատնտեսական ենթակառուցվածքների ոչնչացում», – ավելացրել է նա:
Դյուժարիկը նշել է, որ ՄԱԿ-ի թիմն ավարտել է իր այցը Ղարաբաղ (Արցախ՝ խմբ․), սակայն շարունակում է աշխատել Ադրբեջանի կառավարության հետ՝ տարածաշրջանում իրավիճակը վերահսկելու համար։
