Արարատի մարզի բնակիչ Արման Կոստանդյանը մեղադրվում է մի խումբ անձանց կողմից նախնական համաձայնությամբ մարդու առևանգելու մեջ: Այս մասին Իրավաբան.net-ը տեղեկանում է Դատական տեղեկատվական համակարգից:
Ըստ մեղադրանքի՝ երիտասարդն Ազատավան գյուղի բնակչուհի Նելլի Մնացականյանին ամուսնության նպատակով առևանգելու շուրջ նախնական համաձայնության է եկել հորեղբոր որդու հետ, կազմակերպել և խմբի կազմում իրականացրել է աղջկա առևանգումը:
Արման Կոստանդյանը կալանավորված է: Գործի դատաքննությունը շարունակվում է:
Իրավաբան.net-ը բազմիցս տեղեկացրել է, որ մարդուն առևանգելու համար ՀՀ օրենսդրությունը քրեական պատասխանատվություն է նախատեսում:
Մասնավորապես՝ այս գործով, մարդուն մի խումբ անձանց կողմից նախնական համաձայնությամբ առևանգելը պատժվում է ազատազրկմամբ՝ չորսից ութ տարի ժամկետով:
Իրավաբան.net-ում դատական գործերով անցնող անձանց անունները հասկանալի պատճառով ներկայացվում են փոխված, իսկ լուսանկարները կարող են չհամընկնել իսկականի հետ:
Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
