Փետրվարի 28-ի ուշ երեկոյան ՆԳՆ ոստիկանության Արագածոտնի մարզային վարչության օպերատիվ կառավարման կենտրոն հիվանդանոցից հաղորդում էր ստացվել, որ կտրած-ծակած վերքերով բուժօգնության է դիմել Մաստարա գյուղի 24-ամյա մի բնակիչ:
Այս մասին հայտնում են ոստիկանությունից։
Նա հայտնել էր, որ վնասվածքը ստացել է խոտի դեզի վրայից ցատկելու և ապակու վրա ընկնելու հետևանքով: Ոստիկանության Թալինի բաժնի քրեական հետախույզների ձեռնարկած օպերատիվ-հետախուզական միջոցառումների արդյունքում, սակայն, պարզվել է, որ անձնական հարցերի շուրջ ծագած վիճաբանության ժամանակ նրան դանակով հարվածներ էր հասցրել 39-ամյա համագյուղացին:
Քրեական հետռախույզների ձեռնարկած միջոցառումների և բացատրական աշխատանքի արդյունքում մարտի 3-ին 39-ամյա տղամարդը ներկայացել է բաժին և հայտնել, որ վիճաբանության ժամանակ ինքն է դանակով հարվածներ հասցրել 24-ամյա երիտասարդին:
Մաստարայի 39-ամյա բնակիչը և կազմված փաստաթղթերը ներկայացվել են Թալինի քննչական բաժին:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
