Ուկրաինայի ժողովուրդն արժանի է բարեկամությամբ ապրել իր սլավոն եղբայրների կողքին, հայտարարել է Ռուսաստանի արտգործնախարար Սերգեյ Լավրովը «Ռոսիա 24» հեռուստաալիքով ցուցադրված վավերագրական ֆիլմում։ Գրում է РИА Новости-ն։
«Ուկրաինացի ժողովուրդը կազատագրվի նեոնացիստ կառավարիչներից, նա արժանի է բարիդրացիության, բարեկամության, բարօրության մեջ ապրելու իր սլավոն եղբայրների կողքին», – ասել է նախարարը։
Նրա խոսքով, փոփոխությունները, որոնք հանգեցրին Ուկրաինայում ստեղծված իրավիճակին, իհարկե, տեղի չեն ունեցել առանց արտաքին ուժերի ազդեցության։
————
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
