.png)
Ներկայիս անհանդուրժողականության և պարտավորությունների կամովին կատարման բացակայության պայմաններում, քաղաքացիաիրավական բնույթի վեճերը լուծվում են դատական կարգով: Որպեսզի վեճը քննվի և լուծվի դատական կարգով, անհրաժեշտ է համապատասխան հայցադիմում ներկայացնել դատարան:
Պետք է նկատի ունենալ, որ միայն հայցադիմում կազմելը բավական չէ. նշված հայցադիմումը չի ընդունվի վարույթ, եթե դրան կցված չլինեն օրենքով սահմանված անհրաժեշտ փաստաթղթերը:
Համաձայն ՀՀ քաղաքացիական դատավարության օրենսգրքի 88 հոդվածի` հայցադիմումին կցվում են հետևյալ փաստաթղթերը`
ա) սահմանված կարգով և չափով պետական տուրքի վճարած լինելը հավաստող փաստաթուղթ կամ օրենքով նախատեսված դեպքերում` պետական տուրքի վճարման ժամկետը հետաձգելու կամ տարաժամկետելու կամ դրա չափը նվազեցնելու վերաբերյալ միջնորդություն,
բ) հայցադիմումին կարող են կցվել նաև հայցապահանջները հաստատող ապացույցներ,
գ) եթե հայցադիմումն ստորագրված է հայցվորի ներկայացուցչի կողմից, դրան կցվում է նաև վերջինիս` հայց հարուցելու լիազորությունները հավաստող լիազորագիրը,
դ) պայմանագիր կնքելուն հարկադրելու մասին հայցադիմումին կցվում է համապատասխան պայմանագրի նախագիծը:
