Հուլիսի 9-ին, առավոտյան ժամը 10-ին, ոստիկանության Հրազդանի բաժնում ահազանգ է ստացվել «Հրազդան» բժշկական կենտրոնից: Հայտնել են, որ մահացած վիճակում տեղափոխվել է Երևանի բնակիչ, 51-ամյա մի տղամարդ:
Դիակի վրա, այլ վնասվածքներից բացի, առկա են եղել նաև մեղվի խայթոցի նմանվող բազմաթիվ հետքեր: Պարզվել է, որ ահազանգից կես ժամ առաջ երևանցի տղամարդը եղել էր Հրազդանի մոտակայքի դաշտավայրում, որտեղ տեղադրված են մեղվի փեթակներ: Մահացածին իր մեքենայով հիվանդանոց էր տեղափոխել նրա 36-ամյա զարմիկը, որը հենց մեղվապահն էր:
Նախնական տվյալներով՝ ժամը 9։40-ի սահմաններում մեղվապահը նկատել էր, որ մեղուները հարձակվել են մորեղբոր որդու վրա: Մեղուների ուշադրությունը շեղելով իր կողմը՝ նա մոտ 200 մետր հեռացրել է նրանց: Ապա իր «ԳԱԶ-24» մակնիշի մեքենայով մոտեցել է զարմիկին։ Այդ ընթացքում նա մեքենան հետընթաց է վարել և անզգուշաբար վրաերթի ենթարկել գետնին ընկած զարմիկին: Հետո անմիջապես նրան տեղափոխել է հիվանդանոց, բայց, ինչպես պարզվում է, ուշացած:
36-ամյա տղամարդը ներկայացվել է Կոտայքի մարզային քննչական վարչություն։ Նախաքննությամբ հանգամանքները պարզվում են:
