«Երևանում որևէ ինքնակամ կառույց այլևս չի օրինականացվելու». աշխատանքային հերթական խորհրդակցության ժամանակ քաղաքապետ Հրաչյա Սարգսյանը, անդրադառնալով արձանագրվող դեպքերին ու թեժ գծով ստացվող ահազանգերին, բնակիչներին մեկ անգամ ևս հորդորել է զերծ մնալ ապօրինի գործողություններից:
***
Մայրաքաղաքում քաղաքացիների դժգոհությունները հաճախակի են թափառող կենդանիների հետ կապված: Աշխատակազմին ներկայացնելով «Թափառող կենդանիների վնասազերծման կենտրոն» ՀՈԱԿ-ի տնօրենի ժ/պ Արմեն Բեգոյանին՝ քաղաքապետը հանձնարարել է գրանցել առկա խնդիրներն ու պատրաստել համապատասխան արձանագրություններ՝ դրանց համալիր լուծումներ տալու նպատակով:
***
Երևանյան փողոցներից կապամոնտաժվեն ոչ պիտանի գովազդային վահանակները: Բոլոր վարչական շրջաններում գույքագրման աշխատանքներն արդեն ավարտվել են: Գործընթացը կմեկնարկի ապրիլի 1-ից:
***
Արաբկիր և Շենգավիթ վարչական շրջաններում սուբսիդիոն պայմանագրերի համաձայն մեկնարկել են չլուսավորվող փողոցների արտաքին լուսավորության ցանցի կառուցման աշխատանքները:
***
Ավարտական ակտերի և շինթույլտվությունների տրամադրման հետ կապված ուշացումները հաճախ կապում են քաղաքապետի զբաղվածության և դրանք չստորագրելու հետ: Անդրադառնալով երևույթին՝ քաղաքապետ Սարգսյանը նշել է, որ տեղեկատվությունը չի համապատասխանում իրականությանը: Միաժամանակ նշվել է, որ ծանրաբեռնվածության առումով խնդիրներ կան շինթույլտվությունների տրամադրման հետ կապված, և քաղաքացիներին որակյալ ծառայություններ մատուցելու նպատակով քաղաքապետարանն այսօր կառուցվածքային փոփոխություններ է նախաձեռնել ճարտարապետության և քաղաքաշինության վարչությունում:
***
Երևանի Շենգավիթի համալիր մարզաձևերի մանկապատանեկան մարզադպրոցի ևս երեք դահլիճ կհիմնանորոգվի: Աշխատանքների սկիզբը նախանշված է 2023 թվականին: Հանձնարարվել է մարզադահլիճների հիմնանորոգման նախագծման մրցույթը հայտարարել արդեն այս տարի:
«Երևանում որևէ ինքնակամ կառույց այլևս չի օրինականացվելու». քաղաքապետ Հրաչյա Սարգսյան
