Կարմիր խաչի միջազգային կոմիտեի (ԿԽՄԿ) ներկայացուցիչները հերթական անգամ հանդիպել են Ադրբեջանում պահվող հայ գերիներին։
Այս մասին Իրավաբան.net-ի հետ զրույցում հայտնեց ԿԽՄԿ պատվիրակության հաղորդակցման ծրագրերի ղեկավար Զառա Ամատունին:
«Հունվար ամսին հերթական տեսակցությունն է եղել բոլոր այն գերեվարված անձանց հետ, որոնց գերի լինելու փաստը հաստատվել է Ադրբեջանի իշխանությունների կողմից: Նրանց թվում են ինչպես 2020 թվականի պատերազմի, այնպես էլ 2021 թվականի նոյեմբերին տեղի ունեցած հարձակման հետևանքով գերեվարվածները»,- ասաց նա։
Հարցին, թե կոմիտեի ներկայացուցիչները քանիսին են կարողացել տեսնել, Զառա Ամատունին պատասխանեց, որ գերեվարված անձանց թվի, ինչպես նաև նրանց առողջական վիճակի և պահման պայմանների մասին ոչինչ չի կարող հայտնել:
Նա նաև նշեց, որ տեսակցությունների շրջանակում գերիներին հնարավորություն է տրվել կապի տարբեր միջոցներով իրենց հարազատների հետ կապ հաստատել:
«Գերիների հարազատները կոմիտեի ներկայացուցիչների միջոցով նախապես Հայաստանից նամակներ ու տեսաուղերձներ են փոխանցել գերիներին, իսկ նրանք Ադրբեջանից պատասխան նամակներ ու տեսաուղերձներ բերել Հայաստան»,- նշեց նա:
