«5165» կուսակցության անդամ Մենուա Սողոմոնյանը «Եռաբլուր» զինվորական պանթեոնում, լրագրողների հետ ճեպազրույցի ժամանակ նշեց, որ տարածաշրջանում աշխարհաքաղաքական ճարտարապետությունը դեռևս ձևավորված չէ։
«Այս պայմաններում, լինելով փոքր պետություն, մենք պետք է ներքին միասնականության շնորհիվ կկարողանանք դիմակայել նետված մարտահրավերներին։ Երբ մարտահրավերները մնում են չպատասխանված, հետո դրանք ավելի սպառնալից կերպով են իրենց զգացնել տալիս։ Ցավոք սրտի, այսօրվա արտաքին քաղաքական ուղեգիծը ոչ թե գնում մարտահրավերներին պատասխանելու իմաստով, այլ մարտահրավերներից խուսափելու իմաստով։ Օրինակ՝ հայտարարվում է, որ առանց նախապայմանների հարաբերությունների կարգավորման ենք գնում, բայց առնվազն թուրքական 2 նախապայման, ցավոք սրտի, արդեն կատարված է։ Մեկը օբյեկտիվ իրողությունների բերումով, Արցախից հայոց զորքերի դուրսբերման մասով, 2-րդը՝ ՀՀ-ն պետք է հրաժարվի Հայոց ցեղասպանության ճանաչման պահանջատիրությունից, դա ևս կատարման ընթացքի մեջ է»,-նշել է նա։
Խաղաղության պայմանագրի մասին խոսելիս Սողոմոնյանը նշեց, որ այն պետք է, սակայն մեր տարածաշրջանում խաղաղությունը չի աշխատում նույն տրամաբանությամբ, ինչպես եվրոպական տարածաշրջանում։ Ըստ նրա՝ հայ-ադրբեջանական հարաբերությունները չեն կարող իրենց բնույթով լինել այնպիսին, ինչպիսին ֆրանս-գերմանական հարաբերություններն էին։ Պատճառը ինչպես քաղաքական արժեհամակարգն է, այնպես էլ սոցիալ-մշակութային տարբերությունները։
