Ազգային ժողովի Կառավարության հետ հարց ու պատասխանի ժամանակ «Պատիվ ունեմ» խմբակցության պատգամավոր Տիգրան Աբրահամյանը հարց ուղղեց Պաշտպանության նախարար Սուրեն Պապիկյանին, 2021 թվականի մայիսի 14-ին անհետացած ժամկետային զինծառայող Նորիկ Մկրտչյանի մասին:
«Մինչև այս պահը Նորիկ Մկրտչյանը չի հայտնաբերվել: Նրա անմիջական հրամանատարներից և ծառայակիցներից ոչ ոք չի անցնում քրեական գործով, որպես կասկածյալ կամ մեղադրյալ: Մեկ այլ նման միջադեպ 2021 թվականի նոյեմբերի 12-ին մարտական հենակետերից մեկում կարոլ է պայմանագրային զինծառայող: Այս պահի դրությամբ նրա գտնվելու վայրի հետ կապված որևէ տեղեկություն չկա: Զինծառայողների անհայտ պայմաններում անհետանալը խոսում է իրավիճակի լրջության մասին: 2-րդ դեպքով նույնիսկ պաշտոնական հաղորդագրություն չի եղել: Ի՞նչ է հայտնի ՊՆ-ին այս երկու դեպքի հանգամանքների մասին: Արդյո՞ք ձեռնարկվել են բոլոր հնարավոր միջոցները զինծառայողներին հայտնաբերելու համար: Նաև պարզաբանեք, թե 2-րդ դեպքով ինչո՞ւ պաշտոնական հաղորդագրություն չի եղել»,-ասաց Տիգրան Աբրահամյանը:
Հարցին ի պատասխան՝ ՊՆ նախարարն ասաց, որ բոլոր գործերը քննվում են Քննչական կոմիտեում: Նա նշեց, որ առավալ մանրամասն կարող է խոսել առանձին հանդիպման ժամանակ, իսկ ամբիոնից այլ բան չի կարող ասել:
Նշենք, որ ավելի վաղ Իրավաբան.net-ը զրուցել էր անհետ կորած ժամկետային զինծառայող Նորիկ Մկրտչյանի մոր ներկայացուցչի հետ:
Լուսինե Վիրաբյանը հայտնել էր, որ Նորիկ Մկրտչյանին մեղադրանք է առաջադրվել դասալքության համար: Հուլիս ամսին հարուցվել է քրեական գործ: Ռազմական ոստիկանության կողմից հայտարարվել է հետախուզում:
