«Այս պահին գյուղում սովորական վիճակ է, մի քանի ժամ է՝ կրակոցների ձայներ չկան»,- այս մասին Իրավաբան․net-ի հետ զրույցում ասաց Սյունիքի մարզի Նորավան գյուղի գյուղապետ Սլավիկ Պապյանը։

Նա նշեց, որ գյուղացիների շրջանում խուճապ չկա և անմիջապես գյուղին վնասներ չեն հասցվել։

Հիշեցնենք, որ նոյեմբերի 16-ին, ժամը 13։00-ի սահմաններում, ադրբեջանական ԶՈՒ ստորաբաժանումները հերթական սադրանքն են նախաձեռնել ՀՀ արևելյան սահմանագոտու ուղղությամբ՝ գնդակոծության ենթարկելով հայկական դիրքերը։

Պաշտպանության նախարարությունը քիչ առաջ հայտարարություն տարածեց, որում ասվում էր․

«Ռուսական կողմի միջնորդությամբ ձեռք բերված պայմանավորվածության համաձայն՝ ժամը 18։30-ից ՀՀ արևելյան սահմանագոտում կրակը դադարեցվել է, իրադրությունը հարաբերականորեն կայունացել է։ Հիշեցնենք, որ նոյեմբերի 16-ին, ժամը 13։00-ի սահմաններում, Ադրբեջանի ԶՈՒ ստորաբաժանումները հարձակում են գործել սահմանի տվյալ ուղղությամբ տեղակայված հայկական դիրքերի վրա։ Հակառակորդը կիրառել է նաև հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։